Mipui nghahhlelh Spain vs Portugal

Zanin dar 11:30-ah Portugal leh Spain ten World Cup group stage-a an match hmasa ber an khel dawn a, football ram ṭha pahnih hi Russia a inkhel tur zinga ngaihven hlawh ber pawl a ni.

Portugal hi European champion an nih avangin ngaihven an hlawh a, Cristiano Ronaldo telna ram an nih avangin an boruak a te thei lo sa hrim hrim bawk.

Spain hi world champion ni tur khawpa theihna nei sang an nih avangin ngaihven an hlawh a, Portugal nena an inhmachhawn nan match hnih chiah a awm tawh tihah coach Julen Lopetegui an ban avangin ngaihven an hlawh lehzual.

Ronaldo telna
Portugal-in World Cup khelh hmaa Russia pan tura an inbuatsaihnaah Ronaldo tel loin Tunisia leh Belgium an inhnehtawkpui a, Real Madrid forward awm hnuah erawh 3-0 in Algeria an sawp thung.

World Cup hnuhnung pathuma goal khat vek khungtu Ronaldo a awmin Portugal player ten inrintawkna an ngah sawt tih a hriat a, zanin an inkhel turah pawh Spanish football hrechiangtu Ronaldo bawk a pawimawh leh ang.

Hetihrual hian European champion hi Ronaldo-ah ringawt innghata anga ngaih erawh a fuh lo thung–Euro 2016 final-ah khan Ronaldo zawnchhuah a ni a, a tel loin an champion zui tih kha theihnghilh sak loh a ṭha.

Tlarhma lamah AC Milan forward Andre Silva leh Manchester City champion puitu Bernardo Silva te hi danglamna thlen thei khawpa player ṭha an ni a, si ban nghak turin tawnhriat nei ṭha Rui Patricio, defence-ah Pepe, midfield-ah Joao Moutinho te an neih bawk avangin champion thei huanga dah an ni hi thil awm lo a ni lo.

Team ṭha Spain
Engtiklaimahin Spain-in player an tlachham ngai lo a, Russia-a an hruai ve loh player Chelsea midfielder Cesc Fabregas, striker Alvaro Morata, forward Pedro leh defender Marcos Alonso te ringawt pawh hi Russia-ah team dang tan khel se, 'champion tum ngam' tur an ni.

Mahse, Spain hian 2014 khan zirlai ropui tak an lo zir tawh. World champion nichungin Brazil an pan a, an player neih dan enin nomawi humhim tura beisei an ni bawk. Mahse, an match hmasa berah Netherlands lakah 5-1 ngawtin an mualpho nghal a, an tawpna chu group stage a ni!

Spain-in Brazil-a thil thleng kha theihnghilh an duh tawh a, tunah chuan thawnthu thar ziak turin an inbuatsaih mek–tlarhnung aṭanga tlarhma thlenga world class player tlar thei an nih avangin theihna an nei tih a chiang a, an mamawh awmchhun chu 100% pek leh vanneihna chiah a ni.

Manchester United goalkeeper David de Gea hi paltlang hautak tak tur a ni a, amah venpui turin Ronaldo hrechiangtu Sergio Ramos, Gerard Pique leh Jordi Alba te ho an awm bawk. Midfield-ah Andres Iniesta, Sergio Busquets leh Isco te ho an awm a, goal khung turin Diego Costa an nei–an chhe lo tih hi a sawi dan awlsam ber chu a ni.