World champion nih kan tum – Hierro

Spain-in World Cup khelh nan ni thum chiah an nei tawh tihah Real Madrid-in an coach Julen Lopetegui an chhuhsak thu an hria a, a tukah an coach hi an ban nghal!

La Roja-in an coach an ban thu an puan hnu lawkah sporting director nilai Fernando Hierro chu coach ni tura an lakluh thu an puang a, player a nih laia Spain captain ni thei Hierro chuan world champion nih an tum thu a sawi.

Kum 50 mi manager chuan, "World Cup nomawi chawi turin Russia-ah kan kal a, chumi ti thei tur chuan hun duhawm tak kan nei bawk a, thil dang ngaihtuah thei kan ni lo. Player-te pawh an phur takzet a, an hmaa chona inchhawp hi hmachhawn an duh a, hahchawl hman kan ni lo.

"Player-te hian 100% in an theihna zawng zawng nen an khel dawn tih ka hria a, World Cup-ah chuan tumahin an ti mai mai ngai lo. He inelna hlutzia hi kan hria a, kan mawhphurhna hlen kan duh vek a ni," a ti.

Hierro chuan sawi zawmin, "Spanish FA President-in coach ni tura min duh thu a sawi khan duhthlan tur pathum ka nei–Aih tih emaw, kalsan tawp emaw 'Aw' tih a ni. Mahse, 'Aih' tia ka chhan chuan engtikahmah ka inngaidam thei dawn lo a ni," a ti a, an ramin a mamawh avanga thutlukna huaisen thlak tak a siam thu a sawi.