Emery hna a hautak nghal dawn
Nimin khan season thara Premier League fixture tur tih chhuah a ni a, Arsenal manager thar Unai Emery hna a hautak dawn hle. Gunners hian an match hmasa ber atan August 11 zanah champion lai Manchester City an mikhual dawn a, a kar lehah Chelsea nen Stamford Bridge-ah London derby an khel zui dawn a ni.
Match hmasa ber dangah Manchester United chuan Leicester City mikhualin, Liverpool pawhin Anfield-ah West Ham an lo dawngsawng ang. Championship lama pakhatna ni chunga kai thar Wolverhampton Wanderers chuan Everton an hmachhawn nghal bawk ang.
Tottenham Hotspur-in khualmualah season bul an ṭan dawn, season hmasa pathumna hi Newcastle khelmual St James' Park-ah an lenglut ang. Spurs hian season thar aṭangin an khelmual thar White Hart Lane an hmang thei tawh dawn a, an home match hamsa erawh Wembley Stadium-ah an la khel dawn. Pound maktaduai 850 zeta an sak ṭhatah hian an match hmasa ber atan September 15-16 kar tawpah Liverpool an mikhual ang.
Emery hmabak
A zawna season 22 zet Arsenal a enkawl hnuah Arsene Wenger-a'n a hna a kalsan a, French manager thlaktu Emery tan Premier League match hi a competitive match hmasa a nih dawn avangin Pep Guardiola naute hmachhawn hi fiahna hautak leh harsa a ni ang.
Season dang ang bawkin December thlaah match khelh tur a tam leh dawn a, hun harsat lai takin Gunners hian Tottenham nen North London derby an khel dawn a, Spurs bakah hian Manchester United an tlawh dawn bawk a ni.
Reds leh Europe
Premier League match 380 khelh ni tur tarlan a ni tawh a, mahse a darzat erawh tarlan vek a la ni lo - hei bakah hian TV lama an pek chhuah ber tur pawh a la chiang lo bawk. EPL season thar fixture a chuah ruala sawi hlawh pakhat chu Liverpool league match leh Champions League an khelh hun tur inrem dan a ni.
September 18-19 aṭangin Champions League group match khelh ṭan a ni dawn a, season hmasa UCL finalist Reds hian group match vawi ruk an khelh hma chiah hian khualmualah league match an khelh a ngai vek dawn niin a lang. League-ah hian Arsenal, Chelsea leh Tottenham te an tlawh a ngai dawn.
Manchester United leh Spurs te pawhin UCL group match an khelh hma chiaha an league match vawi li chu khualmualah an khel ve dawn bawk a, hetih lai hian Manchester City erawh vawi hnih chiah an zin chhuah a ngai thung dawn a ni.
Kai thar lam
September 8-9 hian season thar international break hmasa ber neih a ni dawn a, hemi hma hian Premier League hi match li khelh hman tura duan a ni. Championship aṭangin Wolves, Cardiff City leh Fulham te an inhlangkai thar a, an tan a bul ṭan ṭhat a pawimawh dawn.
Championship lamah Wolves hian point kua zeta sang falin pakhatna an ni a, an match hmasa lamah Everton, 2016-17 champion Leicester leh Liverpool te an hmachhawn dawn - point hmu loin match thum chhung kal thut thei dinhmunah an ding.
Fulham erawh an mahni aia lian bik lo nia ngaih Crystal Palace an hmachhawn dawn. Chutih rualin season hmasa tawp lama harhtharna chang Palace zawhah Tottenham an tum ang, Cardiff pawhin an match hmasa pahnihah Bournemouth leh Newcastle te an tum dawn a ni.