Nadal a inhnukdawk

World number 1 Rafael Nadal chuan kar leh chhunga khelh tur Fever-Tree Championship-ah inlan a tum thu sawi tawh mah se a inhnukdawk. Nadal hian Pathianni zan khan a vawi 11 nan French Open nomawi a chawi a, tunah chuan chawlh hahdam rih a duh a ni.

Kum 32 mi Nadal chuan, "Ka doctor nen kan inbia a, ka taksa dinhmun min hrilh hnuah chawlh ka mamawh a ni. Inelna buatsaihtu leh ka inkhel en tuma ruahmanna lo siam tawh zawng zawngte chungah ngaihdam ka dil," tiin a sawi.

Spanish tlangval Nadal hian 2008 khan Queen's Club title hi a lo la tawh a, tun hnai season thum chhung erawh chu a inlan dawn lo tihna a ni. Nadal hian vawi hnih a champion tawhna Wimbledon-ah pawh a tel ngei dawn em tih a la sawi chiang thei lo. Clay court-ah a inkhelh nasat avangin chawlh a mamawh a ni.

Grand Slam vawi 17 champion tawh Nadal inlan dawn lo mah se world number 1 hlui Novak Djokovic chuan a inlan tur thu a tichiang ve thung. Grand Slam vawi 12 champion tawh Djokovic hi tun hnai kum riat chhunga a vawi khat nan a inlan ang.