PSG-in player hralh an ngai

French club hausa Paris St-Germain chuan financial fair play (FFP) rules hnuaia hrem an nih loh nan June hmaa player hralh ngei an mamawh a, an player hralhchhuah hi pound maktaduai 52.9 man an nih a ngai bawk!

UEFA-in financial fair play (FFP) rules hmangin club-te chu an sum hmuh aia tam insengso lo turin dan khirh tak hnuaiah a kaihruai a, he dan bawhchhia chu pawisa chawitir an ni ṭhin. UEFA hian September-a PSG sum hman dan kha an zirchiang a ni.

PSG hian August 2017 khan Neymar chu khawvela footballer manto ber ni turin pound maktaduai 200-in an lalut a, Kylian Mbappe chu Monaco aṭangin loan-a lalut bawkin tun nipuiah pound maktaduai 165.7 in an la nghet ang.

UEFA chuan, "Kum 2017 nipui transfer leh tun nipui transfer lo awm tura club te sum hman dan uluk takin kan thlithlai dawn," tiin an sawi a, dan an lo siam tawh chu club-ten an bawh chhiat leh chhiat loh an zirchian tur thu an sawi.

Turkish champion Galatasaray chu FFP bawhchhiat vang hian pound maktaduai 5.3 chawitir an ni a, 2021-22 chuan an lakluh aia tam sum an hman hi hnawhkhat vek hman tura beisei an ni bawk.

UEFA chuan PSG hi tun dinhmunah chuan dan an bawhchhiatna an la hmu lo a, mahse June 30-a financial year a tawp hunah chuan hrem an nih lohna hi chhawm nung zel tur chuan pound maktaduai 50 chuang man player an hralh hi a ngai thung ang.