Hnehna nen Federer a rawn kir

Roger Federer chuan Stuttgart Open-ah hnehna nen bul a ṭan. Nilaini zan khan Federer hian Mischa Zverev chu 3-6, 6-4, 6-2 a hnehin grass court season a bul ṭannaah hnehna a chang nghal.

Kum 36 mi Federer hi clay court-ah a inlan miah lo a, inelna lian French Open pawh a khel lo. Season hmasa pawh khan chawlh a lo la tawh a, a kum atam tawh avangin tournament zawng zawng khelh a tum tawh lo - a chan langsar pakhat chu Wimbledon atan hun pek a duh vang a ni.

Grand Slam vawi 20 champion tawh Federer chuan, "Thla thum chhung chawlh chu a rei duh hle, season tawp chawlh aiin a rei zawk hial a ni. Rawn kir lehna match hmasa berah chuan thil a awlsam vek lo a, a bik takin set hmasa berah kha chuan ka buai ve hle," a ti. Federer hian March 24 khan Miami Open-ah Thanasi Kokkinakis a hneh lo a, hemi hnua a inkhelh lehna hmasa ber a ni.

Swiss star hi a inkhelh loh chhungin ranking lamah Rafael Nadal chuan a chung berah a awm san a, Stuttgart Open-ah hian final a lut phak a nih chuan French Open champion Nadal khumin a chung berah a awm thei leh ang.

Wimbledon champion lai Federer hian tun season chhungin tournament panga a khel tling chiah a, January thla khan Australian Open nomawi chawiin, February khan ABN Amro World Tennis Tournament title a la bawk - Indian Wells lamah erawh pahnihna a ni thung.