Egypt beiseina Salah - Uruguay tan Suarez & Cavani

Kum 28 hnua a vawi khat nan Egypt chuan World Cup an khel ve leh dawn ta a, an hmachhawn hmasak ber tur chu Uruguay a ni - vawiin tlai dar 5:30-ah team pahnih an intawng dawn.

Egypt tan he thu buatsaih thleng hian Mohamed Salah inlan theih dawn leh dawn loh a la chiang lo a, Uruguay erawh Luis Suarez leh Edinson Cavani te nen bul an ṭan nghal ang.

Pharoah coach Hector Cuper chuan, "Match ṭha tak khel chhuak turin phurna kan nei a, kan hmabak hi kan la thutak em em bawk," a ti a, rinkai zawk ni lo mah se Uruguay lakah game ropui pholan a tum.

Egypt ṭantute tana thu hriat nuam lo tak tur erawh Russia-a zin tura an inpetkai hnua match ruk an khelhah an chak tawh miah lo! Uruguay chu uang hmel pu thei an ni bik lo - 1970 hnuah World Cup-a an match hmasa berah an la chak ngai lo; he record duhawm lo hi thaibo ngei an tum dawn.

Egypt mipui tan

Champions League final-a inhliam Salah inhliam tirh khan World Cup a khelh theih loh hial an hlauthawng hman a, mahse Liverpool forward hian Thawhlehni khan an ram team training a zawm leh tawh.

Salah hian social media lamah an ram jersey ha a, ballboot a keng lai thlalak a tar chhuak a, "Egyptian mipui maktaduai 100 chuang tan he silhfen hi ka inbel a ni," a ti a, Russia-ah an ram tan theihtawp chhuah ngei a tum.

Mahse, he thu buatsaih thleng hian Salah dinhmun tur a la chiang lo - coach Cuper chuan, "Uruguay hmachhawn turin dinhmun duhawm takah a ding a ni," tiin sawi mah se team manager Ihab Leheta chuan, "Medical report kan ngaichang leh phawt ang," a ti. He thu i chhiar meuh chuan a chiang tawh ang.

Salah-a'n training a zawm hnuah Egypt-in chanchin lawmawm an neih belh a, hliam vanga match hmasa ber a khelh loh hlauhthawnawm West Brom defender Ali Gabr-a'n inkhel bul a ṭan theih an beisei.

Fimkhur rawh u!

Squad pumpui thlirin Uruguay chu chak tur zawka beisei an ni a, hetihlai hian tlarhmaa Luis Suarez nena inkawp tur Edinson Cavani chuan fimkhur an mamawh thu a sawi.

Paris Saint-Germain striker chuan, "Football chu football a ni a, engpawh thleng thei a ni. Mahni inrintawk leh lutuk pawh hi chetsualna a ni thei a, a pawimawh ber chu game tin hi a harsa dawn tih hriat a ni," a ti a, a ṭawng fimkhur hle.

Kum 31 mi striker hian ram tan match 101 a khelhah goal 42 a khung tawh a, ram tana goal khung tam lama a tluk loh awmchhun chu match 98-a goal 51 khungtu Luis Suarez a ni - zaninah striker pahnih an inkawp dawn!

Uruguay hi an squad 'balance' ber ṭum a ni hial mai thei - tlarhmaa an world class striker pahnih bakah Atletico Madrid defender Diego Godín leh Jose Maria Gimenez, Inter Milan midfielder Matias Vecino leh Juventus rawlthar beiseiawm Rodrigo Bentancur te an kawl a, champion meuh an tum ngam pawh hi a mak lo.