Golovkin leh Saul inhnek hun chiang

Saul 'Canelo' Alvarez leh WBA &WBC middleweight champion Gennady Golovkin te inhmachhawn leh hun tur chu tihchian a ni a, boxer pahnih hi September 15 khian an intawng ang.

September 2017 khan boxer pahnih hi an lo intawng tawh a, sawisel hlawh takin inhnehtawkah puan an ni. Boxer pahnih hian May-a inhnek ṭha leh turin inremna nei mah se Canelo thisenah thil dik lo hmuh a nih avangin Mexican boxer hi thla ruk hrem a ni a, a inhnukdawk.

August 17-ah Canelo hian hrem a nihna hi a hmang zo chiah dawn a, September-ah chuan ring chhung a rap leh thei tawh dawn a ni. Canelo promoter Oscar de La Hoya chuan, "September 15-ah an inhmachhawn ang," tiin a sawi chiang.

Kum 27 mi Canelo hian hrem a nih khan a sa (meat) ei dik tawk loh vanga a taksaa clenbuterol (intihchakna) hmu an nih thu a sawi. Mexican fighter hian vawi 52 inhnek a hmachhawnah vawi 49 hnehna a chang a, vawi khat chiah tlawm hmel hmuin a hneh loh awmchhun hi Floyd Mayweather a ni.

Kazakh fighter Golovkin hi kum 36 mi a ni tawh a, May khan middleweight title chu Vanes Martirosyan lakah humin vawi 20 ngawt mahni title humhim thei record a nihrual a, vawi 39 fight a hmachhawn tawhah a la tlawm miah lo.