Uruguay-in Salah tel lohna Egypt hneh

Nizan Egypt leh Uruguay inkhel ṭan hmain Egypt fan-ten an thu hriat chak loh ber an hria a, chu chu starting XI-a Mohamed Salah tel loh thu a ni - Liverpool forward tel lohna team hi Uruguay chuan 1-0 in an hneh.

Russia-a inkhel turah Uruguay chu chak tura rin sa an ni hrim hrim a, mahse Luis Suarez leh Edinson Cavani telna team hian goal khung tur erawhin minute 89 thleng an nghah a ngai - Jose Gimenez chuan he inkhela goal awmchhun hi a khung a, huaisen taka khel Egypt tan sual let turin hun a awm tawh lo.

Beisei phak lo
Uruguay-in inkhel ṭantir aṭangin beisei an phak lo a, tlarhmaah beisei angin Suarez leh Cavani an hmuhnawm tawk lo. Egypt-in game mawi pholang bik lo mah se an hnaah an chiang a, Uruguay ber an dan theih chuan an hmaa awm hi Russia leh Saudi Arabia an ni tih an hria a, last 16 lut turin an chance a ṭha tih an hai lo.

Luis Suarez-a'n Uruguay tan beisei a phak lo tluan chhuak zak a, South American team hian champion an sawi ri dawn a nih chuan Suarez-a'n a theihna tak tak a pholan a ṭul ang. Barcelona forward hian a chance neih hmasak ber chu hnai zet aṭangin goal hrulah a pet a, goalkeeper chauh a hmachhawn tawh hnuah Egypt si ban nghaktu Mohamed El-Shenawy khup a pet per bawk.

Thutlukna dik
Egypt coach Hector Cuper-a'n team pahnih inkhelh hmain Salah chu 100% deuhthawa chianga starting XI-a a tel tur thu a sawi a, a thusawi dikna erawh hmuh tur a awm lo. Hei mai hi a ni lo, Argentine coach hian kum 45 mi a goalkeeper Essam El-Hadary chu bench-ah a dah a, competitive match-a ram tana a inlan hmasa ber ni turin World Cup-ah Mohamed El-Shenawy chu si ban a nghah tir!

Mahse, Cuper hian thutlukna a siam sual lo. Kum 29 mi goalkeeper Shenawy hian Russia-ah zam hmel a pu lo a, a khel ṭha takzet. First half-ah Suarez goal khung tur a khupin a dang a, second half ṭantirah Liverpool forward hlui shot hi a ke bawkin a dang a, Cavani ball pek ṭha zet chu Suarez-a'n a nan hmain huaisen takin a man hman bawk.

A tawpah chuan...
Uruguay-in an nawr an bansan lo. Shenawy-a'n Cavani volley ṭha zet chu a tlukpui chiaha ṭhain a lo dang a, Egypt chhandamtu a ni. Cavani vek hian freekick hmangin post a pet per zui a, a per lehlam chu Martin Caceres tan pet goal awlsam tak ni mah se Carlos Sanchez pet per nan bak a hmang lo.

Egypt-in point an sual chhuak thei mai dawn niin lang mah se a tawpah player nei ṭha zawk nihna Uruguay-in an lantir a, Pharoah goalkeeper Shenawy tan meuh pawh dang reng turin a theih tawh lo - Sanchez-a freekick aṭanga ball kal chu midang zawng aia zuang sang Jose Gimenez chuan goal kilah tak a tauh lut a, Uruguay an chak.

Egypt hian an match hnihna chu June 19 zanah Russia nen an khel dawn a, Salah dam hman an beisei tawh ang. Uruguay hian June 20 zanah Saudi Arabia an hmachhawn dawn a, hnehna chang tura beisei an ni.