Inelna thlengtu Russia an hmuhnawm

FIFA World Cup 2018-ah Russia-in bul ṭan nan Saudi Arabia 5-0 in an sawp. Ningani zan inkhelah Yuri Gazinskiy-a'n minute 12-na lekah tun World Cup-a goal hmasa ber a khung a, Russia tan substitute Denis Cheryshev-a'n goal hnih a khung belh bakah substitute Artem Dzyuba leh Aleksandr Golovin ten goal khat ve ve an khung belh bawk.

Kumin World Cup bul ṭan nana inkhel te hi ram 32 inlan tur zinga FIFA ranking-a hniam ber pahnih an ni a, inkhel hmuhnawm leh ṭha tak pho chhuak lo mah se goal nga zet khungtu Russia hmel a dang tawh. Stanislav Cherchesov hote hi inelna thlengtu zinga tla hmasa ber South Africa (2010) hnung zui tura dah ngawt theih an ni ta lo.

World Cup a dang

Russia-in World Cup ṭan hmaa an hneh hnuhnun ber chu nikum October thla kha a ni a, an hneh pawh Dynamo Moscow niin friendly match pangngai pawh ni loin hybrid friendly tih a ni.

Tun hnaia an result a ṭhat loh avangin Russia ring lotu an tam a, coach Cherchesov chuan, "Chak kan duh takzet avangin kan chak dawn. Kan chungchang an sawi hi kan game hmasa ber a zawh chuan a danglam tawh ang," tiin mipuiin peihah ngai lo mah se an inpeih thu a sawi.

An inpeih tak tak

Saudi Arabia-in fimkhur taka bul an ṭan chungin an tlarhnung a phu chuang lo a, Arsenal nen pawha sawi zawm tawh Golovin-a cross ball ṭha tak chu vengtu nei lo Gazinskiy-a'n a tauh goal.

Russian club Krasnodar midfielder Gazinsky hi kum 28-a upa a ni tawh a, tun ṭum hi ram tana a goal hmasa ber a ni chauh mah se Russia ram history-a goal hlu ber a ni lawi si.

Russia player zinga hming langsar ber zinga mi Alan Dzagoev chu hliam vangin lakchhuah a ni a, Real Madrid aṭanga inzir chhuak Denis Cheryshev a rawn lut. Villarreal midfielder Cheryshev hi World Cup hnuhnung berah ram tan a tel pha lo a, Euro 2016-ah lah inhliam vangin a inlan lo.

Kum 27 mi Cheryshev hian minute 43-naah a pet goal nghal a, ram tana pet goal hmasak ber a ni. First half-ah Russia-in 2-0 in hma an hruai a, second half-ah a aia tam an khung.

Russia star player zinga mi Alexander Samedov thlaktu Artem Dzyuba chuan a tauh goal nghal a, a luh aṭanga second 89-naah a goal nghal a, a siamtu hi Golovin tho a ni.

Minute 90 hnuah goal hnih dang a lut a, Cheryshev-a'n substitute Dzyuba aṭanga a ball hmuh chu vawi khatah pet nghalin goal kilah a pet lut. A tawp khar nan a ṭhiante ṭum hnih siamtu CSKA Moscow midfielder Golovin-a'n freekick aṭangin Russia goal ngana a khung a, midfielder hmuhnawm zet hi World Cup zawh chuan Europe club lian zawkah a khel dawn.

Cherchesov a hahdam

Russia coach Stanislav Cherchesov chuan, "Kan match hmasa berah hian ka player-te vangin ka rilru hahna ka nei lo. Anni nena thawhho hi a nuam a, an kutah ka innghat a, chuvangin ka hlauhthawnna chhan tur a awm lo," tiin a player-te a fak.

Cherchesov chuan sawi chhunzawmin, "Opening match boruak sang tak hnuaiah buai miah loin kan khel a, Egypt erawh team ṭha zawk an ni a, khawpui leh stadium dagnah kan inkhel dawn. Chuvangin fimkhur taka kan inpuahchah a ṭul dawn a ni," a ti.

Russia hi khelmualah an che ṭha ringawt lo a, inelna ṭan zan hian tun hmaa an mualpho tawhna ṭhin chi leh chi inthliarna lamah pawh an fihlim. A hmuna inkhel entu Belgian journalist Samindra Kunti chuan, "Racism hmuh tur a awm lo a, Saudi Arabia an nem deuh tih lo chu engkim duthusam ang vekin a kaltluang a ni," tiin Vanglaini a hrilh.

Saudi an nep

Saudi Arabia-in World Cup vawi nga an khelhna a ni a, an bul ṭanna match vawi nga an chak lohna a ni a. Group A-ah Uruguay leh Egypt te an awm bawk avangin Saudi tan World Cup beiseina a tawp ang hiala ngaih theih a ni.

Saudi coach Juan Antonio Pizzi chuan, "Hetiang em em a goal tam kan phur hi kan ring lo a, kan beisei ang result kan hlawh chhuak lo. Russia khan kan buaina turin an khel ṭha lam ni loin kan khel ṭha lo a, kan tlarhnung pawh a pawp. Kan khelh dan hmang kan thlak a ngai a, kan match hmasa ber erawh kan theihnghilh a ngai thung," tiin a sawi.