Hma kan sawn dawn - Germany boss

Germany coach Joachim Low chuan Russia-a an match hmasa berah hma an sawn ngei tur thu a sawi. Die Mannschaft hian Pathianni zan dar 8:30 hian Mexico nen Group F match hmasa ber an khel dawn a, Thawhṭanni tlai dar 5:30-ah Sweden leh South Korea te an inkhel ve bawk ang.

Champion lai Germany hian friendly match-ah Austria 2-1 in an hneh lo a, hemi hnu hian Saudi Arabia chu 2-1 in an hneh hram. An player neih dan thlirin Russia rama team ṭha pahnih tir thei tur khawpin an squad chhah mah se kuminah Russia laka goal nga ngawta tlawm Green Falcons chiah an la hneh.

Die Mannschaft coach Joachim Low chuan, "Kan friendly match pahnihah team angin kan nung tawk lo a, amaherawhchu South Tyrol-a training harsa tak paltlang hlim kan nih avangin duh ang thlapa khelh a la harsa. Pathiannia kan inlan hunah chuan hmasawnna hmun tur a awm ang," tiin an insiam ṭhat tur thu a sawi.

An khingpui tur Mexico chungchang sawiin Low chuan, "Mexico hi an che rang a, player pawh an nei ṭha. Tawh an khirh dawn a, hneh theih dan tur kan duahchhuah a ngai a ni," tiin a sawi.

Die Mannschaft squad-ah hian Manchester City champion puitu Leroy Sane pawh a tel pha lo a, tlarhma lamah mi thar Timo Werner chu en bik tur zingah a chhal theih a. Borussia Dortmund forward Marco Reus erawh Euro 2012-ah hming chher tawh mah se inhliam vangin an champion ṭumin a tel lo a, Mexico hi World Cup-a inlan hmasak ber tur a ni ang.

Mexico-in player che rang PSV forward Hirving Lozano leh West Ham United forward Javier Hernandez te bakah ball pe thiam Andres Guardado leh Giovani dos Santos te an kawl a, Germany tlarhnunga che muang pahnih inkawp Jerome Boateng leh Mats Hummels te tan buai theihna tur an ni ang.