World Cup khel thei lo India

World Cup Russia 2018-ah India inlan lo mah se kan chenna ram a nih miau avangin ngaihthah theih a ni lo a, engvangin nge India hian tun thlengin World Cup a la khelh loh? Eng hi nge kan thlen chin ni reng reng tihte hi zawhna awm thei tak a ni.

Ke lawng vang maw?

Kum 1950 khan India-in World Cup qualifier-a an hmachhawn tur ram zawng zawng an inhnukdawk vek a, hei vang hian India chu World Cup khel turin an tling. Mahse, Brazil-a World Cup khelh tur aṭangin India an inhnukdawk a, a chhan zingah ‘ke lawnga khelh phal loh vang’ tih chu hriat hlawh ber a ni.

Mahse hetih hunlaia India captain Sailen Manna chuan ke lawnga khelh phal loh vanga World Cup khel lo anga sawi an nihna chu a pha a, All India Football Federation-in World Cup an khelh loh chhan an sawite thup bo tumna a ni, a ti.

AIFF chuan World Cup-a India kal loh chhanah hian zinna senso tam lutuk, practice hun tlem tawh leh World Cup aia Olympics an ngaihpawimawh zawk vang a ni tih an sawi.

Ke lawng leh India

Kum 1950 World Cup a nih hma, 1948 khan India chuan Britain lak aṭanga zalenna a hmuh hnuin ‘ram zalen’ a nihna anga a match hmasa ber chu Summer Olympics-ah a lo khel tawh a, London khawpuia inkhelah France chu 2-1 in an hneh lo. He inkhela Indian player tam zawk chu ke lawngin an khel.

Hei vang tak hian AIFF-in World Cup khelh loh chhan tam tak a pholang chungin tun thleng hian football pundit leh Indian football zirchiangtu te zingah Indian FA thuchhuah aiin ‘ke lawnga khelh phal loh vang’ tih chu Blue Tigers-in World Cup an khelh loh chhana ngaitu an tam zawk.

The Golden Era

Indian football ropui lai ber tia an sawi ṭhin chu 1950-1960 inkar kha a ni a, Hyderabad City Police head coach Syed Abdul Rahim hnuai­ah India hi khel ṭhinin Asia khawmualpuia team ṭha ber pawl an ni.

Kum 1950-ah World Cup khel lo mah se 1950 Asian Games-ah erawh India inlanin football-ah gold an la a, Sahu Mewalal goal khung hmangin Iran chu 1-0 in an hneh. Bicycle kick hmingthanpui tu Mewalal hian goal li khungin top scorer a ni a, a career chhung zawng khan club leh ram tan goal 1032 ngawt a khung a, vawi 32 ngawt hattrick a siam thei!

Asian Games football-a India captain Sailen Manna hi a hunlaia khawvel defender ṭha pawla sawi a ni a, kum 1953-a English FA-in ‘10 best Captains in the world’ a thlanah a lang phak a, Asian player zinga lang thei awmchhun a ni.

Boot neih hnu

AIFF-in India player-te chu ball boot bun vek tawh turin thu pek a chhuah a, boot an neih hnua inelna an hmachhawn hmasak ber Asian Games 1954-ah erawh group stage aṭangin an tla. ‘The Brazil of Asia’ tih hiala hminglem an pek India an tho vat a, 1956 Summer Olympics-ah palina dinhmun luahin pathumna inchuhah Bulgaria chu 3-0 in an ngam lo.

India-in quarterfinal-a Australia an hneh

ṭumin Neville D’Souza chuan hattrick a siam a, Maharashtra tlangval hi Olympic-a Asian player hattrick siam hmasa ber a ni. 1958 Asian Games-ah India hi palina an ni leh a, 1962-ah a vawi hnih nan gold an la leh bawk - final-ah South Korea chu 2-1 in an hneh.

Kum 1960 Asian Cup-a an inpetkai zawh loh hnuah 1964-ah e­rawh India-in an zia tak tak an chhuah leh a, inelna thlengtu Israel chiah phak loin pahnihna an ni - tun thlengin Asian Cup-ah an chet ṭhat ber a la ni ta reng a ni.

Tunah thawnthu hlui...

Kum 1970 Asian Games-ah India-in 1-0 a Japan hnehin bronze hawn mah se hemi hnuah erawh India-in football-ah chhuan tur a nei lo a, ‘Milian mutthlu’ ti hiala hminglem pek a lo ni ta.

Afro-Asian Games-ah rei tak chhung football khawvela hriat hlawh tawh lo India hming a rawn lang a, silver medal an dawng. Hemi hnuah India a reh leh vang vang a, Bob Houghton an rawih hnuah China coach hlui hoin AFC Challenge Cup 2008 nomawi an chawi a, kum 27 hnua a vawi khat nan Asian Cup 2011 khel turin an tling.

Asian Cup-ah India-in Australia, South Korea leh Bahrain te hneh lo vekin an tla a, vawiin thlengin India-in chhuantham sulhnu a siam leh rih lo.

World Cup zinkawng...

Asian Games, Cup leh Olympic-ah India chu team hlauhawm pawl a ni ṭhin a, 2011 hnu lamah erawh World Cup chu sawi loh Asia ang meuh pawhin team derdep pawl kan ni tawh - kuminah erawh Asian Cup khel turin an inpet kai ve leh a, Mizo tlangval Jeje Lalpekhlua leh Sunil Chhetri an awm avangin Indian football pawhin ngaihven a hlawh ve leh ṭan.

AFC World Cup Qualifier-ah India hian first round aṭangin bul an ṭan a, Nepal an hneh hnuah second round lutin Group D-ah Iran, Oman, Turkmenistan leh Guam te nen an awmho.

Iran tih loh hi chu India tan ‘hneh theih’ a ngaih an ni a, group hmahruaitu ṭheuh bakah group pariat aṭanga pahnihna zinga a sang paliin third round an khelh dawn avangin Blue Tigers ṭantu ten beiseina an nei.

Mahse maw...

Beisei ang erawh India-in an phak lo takzet a, match riat an khelh­ah vawi khat chiah hnehna chang vein table mawng­phahah an awm. Mizo tan erawh mellung pawimawh phumin a awm a, Iran nena an inkhelh ṭumin Jeje Lalpekhlua chu captain a ni a, Mizo zinga India senior team captain ni thei hmasa ber a ni.

Table mawngphaha awm India-in 2019 AFC Asian Cup qualification playoff round an khelh chhunzawm a, inkhel pahnihah 7-1 a Laos sawpin Asian Cup qualification third round an khelh chhunzawm.

India hi Group A-ah Kyrgyzstan, Myan­mar leh Macau te nena awm­hoin match rukah vawi khat chiah an tlawm a, 2019 AFC Asian Cup khel turin an tling. Mizo tlangval Jeje chuan qualifier first round aṭanga chhutin goal sarih a khung a, goal riat khungtu Sunil Chhetri chiah Indian player-ah a phak lo.

Tichuan...

AFC Asian Cup hi January 5 - February 1, 2019 inkarah Dubai khawpuia khelh tur a ni a, AFC hnuaia ram 24 an inel dawn. Khawpui paliah inelna hi neih tur a ni ang a, stadium pariatin an thleng ang.

AFC huanga ram ṭha an inlan kim dawn a, India bakah hian United Arab Emirates, Qatar, South Korea, Japan, Thailand, Saudi Arabia, Australia, Uzbekistan, Iran, Syria, Iraq, China, Palestine, Oman, Lebanon, Turkmenistan, Jordan, Bahrain, Vietnam, Kyrgyzstan, North Korea, Philippines leh Yemen ten an khel dawn.