Samba Boys tan magic 'show' hun

Brazil-in game mawi tak an khelh ṭhin avangin an ball khawih dan leh che vel chu 'magic' tih meuhin an sawi ṭhin a, Pathianni zanah he 'magic' show-na remchang hi Brazil-in an nei dawn.

World champion ni tura rinkai zinga mi Brazil hian Pathianni zan dar 11:30-ah Switzerland chu group match an khelhpui dawn a, an laka mipui beiseina chhi nung chhunzawm turin an theihna an pholan nghal a ṭul ang.

Group E inkhel tur dangah Pathianni tlai dar 5:30 khian Costa Rica leh Serbia an inkhel dawn bawk a, an group-ah Brazil an la awm miau avangin team pahnih tan last 16 luh beiseina chhi nung tur chuan chak nghal a ṭul ang – inkhel a hmuhnawm dawn.

Tite leh harhna

Brazil-in an ram captain hlui Dunga hnuaia beisei an phak loh hnuah Tite chu coach ni turin an lalut a, Corinthians boss hlui enkawlna hnuaia Selecao hmasawnna chu hmuh hmaih theih a ni lo.

June 2016-a Tite-a'n Brazil a enkawl hnuah match 21 khelin vawi khat chiah an tlawm a, goal 47 khungin an lamah vawi nga chiah a lut a, match 16 chu goal chhuah loh an nei – goal an chhuah ṭum pawhin goal khat aia tam chhuah an nei lo!

Tite-a ṭawngkam lar tak an sawi chu, "Zir dan ka zir tawh a ni," tih hi a ni a, coach hlawhtling tak a ni chungin inzir a chawlhsan lo. Brazil khelh dan ṭhin kan hria a, game mawi leh hmuhnawm pholang ṭhin, mahse an chetsual ṭuma tlarhnung pawp tak ṭhin an ni – 2014 semifinal-a 7-1 ngawta Germany an hneh loh khan chu chu a hrilhfiah.

Tite hian 2010-a Corinthians a enkawl hma khan European club ṭhate khelh dan a zirchiang a, attacking lamah Brazilian football-in zir belh tur nei lo mah se defensive game-a zir tur an neih nia a hriatte uluk takin a zir.

Sawi nin theih loh Tite

Europe-ah Tite a inzir hlawhtling thawkhat. Attacking game ringawt khel ṭhin Corinthians chu tlarhnung lam ven dan a zirtir tel a, 2011-ah Serie A-ah a champion pui a, South American Champions League 2012-ah nomawi a chawipui a, FIFA Club World Cup final-ah Chelsea hnehin an champion bawk.

Tite-a'n Corinthians-a a hlawhtlinna Brazil team-ah a chhawm nung a, an tlarhma ṭha sa thuam mawi turin tlarhnung pawp a thawm ṭha a, an game hmachhawn tur a zirin thiam takin player a remkhawm ṭhin a, a vanneihna belhchhah turin a duh ang tak player thlan tur a nei bawk.

Kum 57 mi manager hian 4-3-3

formation a hmang tlangpui a, an khingpui tur a zirin player a thlang ṭhin. Russia an pan hmaa an friendly match-ah Croatia nen an inkhelh ṭumin an khingpuiin attacking football an khel ngam dawn tih a hria a, midfield-ah Casemiro leh Fernandinho a dah lut tel.

An match hnihnaah erawh Austria-in defensive game an khel ṭhin tih hriain midfield-ah Philippe Coutinho a pawt let a, Fernandinho dah chhuakin Paulinho a lut a, Casemiro chu tlarhnung pui tura dah tel a ni – 3-0 in an chak. Zaninah attacking game an khelh rin a ni a, Neymar, Gabriel Jesus, Willian leh Coutinho te kan hmu nghal vek a nih pawhin a mak lo ang.

Neymar telna Brazil

Brazil-in 2014 World Cup-a Germany 7-1 ngawta an hneh loh ṭum khan Neymar chu hliam vangin a inlan thei lo a, kum 26 mi striker hian, "Khelmualah lut thei ni ila kha result kha a danglam ang," a ti hmiah mai!

Pound maktaduai 200 man forward theihna sanziaah inhnialna tur a awm lo a, hliam vanga a chawlh reng hnua ram tana match hnih a khelhah goal hnih a khung leh der tawh – Switzerland lamah Borussia M'gladbach keeper Yann Sommer leh Arsenal defender thar Stephan Lichtsteiner ten hna an ngah sawt dawn tihna a ni.

Brazil ṭhatzia kan sawi rualin Swiss team-in Arsenal midfielder Granit Xhaka, Liverpool nena sawizawm mek forward Xherdan Shaqiri leh Benfica forward Haris Seferovic te an nei ve tho a, an group aṭanga Brazil barakhaih thei tur team an awm a nih chuan anni hi an ni ang.

Switzerland goalkeeper Sommer chuan, "Brazil hmachhawn kan chak tawh takzet a, kan tum ber tur chu a ṭha thei ang bera khelha point hlawhchhuah a ni," tiin a sawi.

Costa Rica vs Serbia

Kum 2014 World Cup-ah Costa Rica-in football khawvel an barakhaih a, quarterfinal an inpetkai. Mahse, he team hian Brazil-a an hnathawh ropui kha chhunzawm tur chuan an insiamṭhat viau a ṭul ang.

World Cup buatsaih nana an friendly match hnuhnung pahnihah an tlawm ve ve a, England laka 2-0 a an tlawm hnuah Belgium chuan 4-1 ngawtin an sawp bawk–team pahnih an hmachhawn hmain Northern Ireland chu 3-0 in an sawp thung a, an tih fuh ṭum chuan team hlauhawm an ni.

Serbia-in Nigeria 2-0 a an hneh hnuah 0-1 in Chile ngam lo mah se 5-1 ngawtin Bolivia an sawp leh a, Russia pan tura an inbuatsaihna a ṭha hle.

Costa Rica tan 2014 World Cup ang bawkin Sporting Lisbon forward Bryan Ruiz chu innghahna tur a ni leh dawn a, Serbia lamin Roma defender Aleksandar Kolarov, Chelsea defender hlui Branislav Ivanovic, Manchester United midfielder Nemanja Matic leh Bolivia laka hattrick siamtu Aleksandar Mitrovic te an nei thung.