Messi hoin Argentina an inlan dawn

Football khawmpui lian ber World Cup 2018 khelh kal laiah zanin dar 6:30 hian Lionel Messi telna Argentina chuan an match hmasa ber atan Iceland an hmachhawn dawn. South American ram hi world champion vawi hnih ni tawh an nih laiin, an khingpui tur Iceland erawh an inlan vawi khatna tur a ni thung.

Argentina awmna Group D hi hriatthiam harsa pawl tak an tling, an match hmasa ber hi a pawimawh dawn. Zanlai dar 12:30-ah Croatia leh Nigeria te an intawng ve dawn bawk. Croatia hi Real Madrid leh Barcelona midfielder Luca Modric leh Ivan Rakitic te nena inlan tur an ni–khelmual chhungah an hmuhnawm dawn.

Messi tan

Argentina tana goal 64 khung tawh Lionel Messi-a'n inelna lianah an ram a la champion pui lo a, kum 30 a tlin tawh avangin atan World Cup hnuhnung a ni tawh thei. Ram tana goal khung hnem ber hian 2014 World Cup-ah khan pahnihna a nihpui bakah Copa America final vawi hnih a khelhpui tawh bawk.

Barcelona forward Messi hian a club tan Champions League nomawi pali leh La Liga title pakua zet chawi tawh mah se World Cup a la neih loh avangin a lawm a kim lo, a famkim tawk lo tia mi tam takin an sawisel chhan pawh a ni.

Argentina coach Jorge Sampaoli-a'n April thla a tih chhuah tak a lehkhabuah chuan, "Lionel Messi hian a rilruah thil tum lian tak a neih chu World Cup champion nih a ni. A champion lo a nih chuan a lawm a kim thei dawn lo," tiin a ziak. An champion theihna tur a nih chuan eng pawh tih an huam dawn tih a hriat theih.

Goal a ngai

Jorge Sampaoli-a'n Inter Milan striker Mauro Icardi hnawl ngam khawpin hmatawng a nei ṭha, Messi thlawp tur hian Gonzalo Higuain leh Sergio Aguero te bakah Paulo Dybala a la awm cheu bawk. Ram malkhaiah chuan anni aia nei ṭha an awm bik lo tawp ang.

Mahse, hmatawng nei ṭha viau chungin Argentina hian qualifying lamah chuan goal an khung hleithei lo. Match 18 aṭangin goal 19 chiah an khung a, heng zingah hian an match hnuhnung bera an hmachhawn Ecuador laka Messi hattrick a tel.

Higuain leh Aguero te hian Juventus leh Manchester City tan an theihna sanzia an pholang tawh a, season liam ta khan league-ah an champion pui ve ve. A tawi zawnga sawiin, qualifier lamah goal khung tam lo mah se inelna takah chuan ram dang tlarhnung an su hawng ngei ang tih a rin theih.

Engtin nge ni ang?

Chak turin goal khung a ngai a, chutihrualin a hnunglam an inrem phui a ngai ve bawk. Argentina tan hliam vangin Manchester United goalkeeper Sergio Romero a inlan dawn loh avangin Chelsea keeper Willy Caballero hmel kan hmu ang. Tlarhnung laiah Man City defender Nicolas Otamendi dinpui turin Marcos Rojo nge Federico Fazio lut zawk dawn tih hriat a la ni lo.

Midfielder Manuel Lanzini a inhliam avangin Enzo Perez chu koh leh hnuhnawh a ni a, Ever Banega pawh kartir lam kha chuan mimal training neih tir ala ngaih avangin Iceland lakah a la inla kher lo mai thei. Barcelona midfielder hlui Javier Mascherano leh Paris Saint-Germain attacking midfielder Angel Di Maria te pawimawhna a sang zual dawn.