Atletico-ah Griezmann a cham dawn

Antoine Griezmann chuan an ramin World Cup match hmasa ber an khelh hmain a hma hun tur a tichiang a, France international hian season tharah Atletico Madrid tan a khelh chhunzawm dawn.

Kum 27 mi Griezmann hi La Liga champion Barcelona chuan lakluh an duh a, Catalan club tan Griezmann thutlukna hi chanchin lawmawm a ni lo ang. Griezmann hian 2014 khan Real Sociedad aṭangin Atletico a zawm a, inelna hrang hrangah goal 112 khung tawhin season hmasa bikah khan goal 29 khungin Europa League nomawi a chawipui.

France tana match 54 khel tawh Griezmann hi World Cup khel turin Russia-ah a awm mek a, an match hmasa ber atan vawiin tlai dar 3:30 hian Australia an hmachhawn ang.

France squad-ah hian tunlai player langsar an tam hle, chutihrualin an zinga pasarih chiahin ram tan major tournament-ah tawnhriat an la nei. Euro 2016 ang bawkin coach Didier Deschamps-a'n Griezmann hi tlarhma lamah a chhawr ṭangkai leh hlein a rinawm.

Griezmann bakah hian Chelsea striker Olivier Giroud an la nei bawk a, rawlthar duhawm Kylian Mbappe erawh training-na lamah hliam a tawrh avangin he thu buatsaih lai thleng hi chuan a dinhmun a la chiang lo.

France hi Group C-ah Australia bakah Peru leh Denmark te nen an awmkhawm a, Peru leh Denmark te hi an group match hmasa atan zanin dar 9:30-ah an inkhel zui ve dawn bawk a ni.