Real-in coach thar Lopetegui an pho chhuak ; Spain chet dan a demawm - Real President

European champion Real Madrid chuan Ningani zan khan Spain ban tak an coach thar Julen Lopetegui chu media hmaah an pho chhuak a, Real Madrid president Florentino Perez chuan, "Spain chet dan kha engti hawi zawng pawhin sawi mam theih a ni lo," a ti.

Real hian Spain-in an World Cup match hmasa ber khel turin ni thum chauh an nei tawh tihah La Roja coach Lopetegui chu an coach thar ni tura an lakluh thu an puang a, Spanish football federation chuan hei hi hrethiam loin an match hmasa ber khelh nan ni khat chiah an nei tawh tihah Lopetegui hi an ban ve nghal!

Perez chuan, "Spanish FA president Luis Rubiales chet dan kha hriatthiam theih a ni lo a, a chapona avanga thutlukna duhawm lo tak a ni," a ti a, Spanish football hotupa chuan Real Madrid a zah lo a ni, a ti bawk.

Insawifiahna

Spanish football federation hian Lopetegui an ban chhan chu an hriatpuina tel loa Real Madrid indawrna a lo neihpui vang a nih thu an sawi a, president Luis Rubiales chuan, "Coach ni tura Lopetegui an puan hma minute 5-10 velah hrilh ka ni chauh a, World Cup zawh min nghak tura ka ngenna chu an ngai pawimawh lo," a ti.

Perez chuan hei hi chhangin, "Thu lengvak laka inven nan Lopetegui kha puang kan ni a, chumi ti tur chuan thuneihna kan nei bawk. Mahse, Lopetegui hian Spain a phatsan ta ang maiin chhuah a ni a, Spanish FA president chet dan hi kan rin phak piahlam a ni," tiin a sawi.

Real Madrid president chuan Chelsea pawhin Euro 2016 hmaa Italy boss Antonio Conte an lakluh thu an puan thu leh, 2014 World Cup hmaa Manchester United-in Netherlands boss Louis van Gaal an lakluh thu an hriat vek tawh thu a sawi bawk a, an thiltih chu a dik lohna bik a hre lo.

Hun tawn hrehawm

Real boss thar Lopetegui pawh a insawifiah a, Spanish club a zawm tur thu an tihchian ṭuma player te an chi ai loh thu a sawi. Player a nih laia Real Madrid leh Barcelona tana khel tawh coach chuan, "Ka player-te kha an phur em em a, training hlimawm tak kan nei a ni," a ti.

May 22-a Spain tana con­tract thar ziaktu coach chuan sawizawmin, "Dik takin engkim kan kalpui tihah hian ka chiang a, Rubiales chet zui dan hi ka hrethiam lo. Real ka enkawl tur thu ka hrilh pawhin lawmpuina thu min hrilh a, ka chungah a ṭha em em a ni," a ti a, ban nih a inbeisei lo.

Zinedine Zidane thlak tura kum thum chhung atana contract ziaktu manager chuan, "Ka nu thihni tih lohah chuan Spain coach aṭanga ban ka nih kha ka hun tawna hrehawm ber a ni a, mahse vawiin hi ka hun tawna hlimawm ber a ni thung," tiin Real a pan thei chu a hlim thu a sawi.