Kyrgios a chak nghal

Hliam vanga French Open khel thei lo Nick Kyrgios a dam tawh a, Aus­tralian tennis star hian Ningani zan khan Maximilian Marterer chu 6-4, 4-6, 6-3 a hnehin Mercedes Cup last 16 a inhlangkai.

Kum 23 mi Kyrgio hi hliam vangin thla hnih chhung a inkhel thei lo tawh, April 13 hnua a match hmasa berah duhthusama ṭhain khel nghal lo mah se hnehna a chan avangin atan bul ṭanna chhia a ni lo.

Kyrgios chuan, "Ka kiu hliam vangin ka buai rei ta hle a, ka tan hian thil engkim mai hi a kal tluang dawn lo niin ka hre hman. Tunah erawh duhthusam la ni chiah lo mah se harsatna lian tham nei loa ball ka vaw leh thei ta hi a lawmawm hle," tiin a sawi.

Inkhel dangah Feli­ciano Lopez chuan Gilles Simon 7-6 (8-6), 6-4 in a hneh a, Lopez leh Kyrgios ten quarterfinal luh tumin hmun an inchuh leh ang. Tomas Berdych pawhin Benoit Paire 7-6 (7-3), 6-4 in a hneh a, Milos Raonic chuan 6-2, 6-4 in Marton Fucsovics a hneh bawk.