Messi leh Argentina dangtu Halldorsson

World champion nih tumin Lionel Messi awmna Argentina chuan Russia an pan a, an match hmasa berah an beisei ang result an nei lo.

Inrinni zan Group D inkhelah Argentina hi Iceland nen 1-1 in an inhnehtawk; Messi-a penalty pet leh a ṭhiante goal khung tur tam tak dangtu goalkeeper Hannes Halldorsson chu Iceland chhandamtu a ni.

Jorge Sampaoli-a'n Juventus striker Gonzalo Higuain aiin Sergio Aguero ring zawkin inkhel bul a ṭantir a, a tisual lo. Manchester City striker hian minute 19-naah box chhunga a ball hmuh chu vir puiin chiang zetin a khung a, World Cup match kua a khelh aṭanga a goal hmasa ber a khung ve chauh.

World Cup nomawi vawi hnih chawi tawh Argentina hi nuamsa taka chak tura rinkai an ni zui. Mahse, Iceland lamin counter attack aṭangin na takin an nawr let nghal thei zel. Aguero goal khung lawma fans hlim zai pawh a reh hmain striker Alfred Finnbogason chuan keeper Willy Caballero ball dan per chu a chhuih lut zui ve nghal – goal pahnih luh inkarah hi minute li leh second 15 chiah a awm.

Messi an dang
Inkhel ṭan hma aṭangin Lionel Messi chu mipui sawi hawlh ber a ni a, Spartak Stadium chhunga Argentina inkhel entute pawhin beiseina nen an captain chu an thlir. Barcelona forward hian goal khung tumin vawi 11 zet pet mah se a hlawh tling lo.

Italy striker hlui Luigi Riva (1966) tih lohah chuan (13 v Sweden leh v Israel in 1970) World Cup match khata goal khung si loa shot ngah ber a ni.

Kum 30 mi Messi hian hun ṭha ber a nei. Defender Hordur Magnusson-a'n midfielder Maximiliano Meza a tlawh thluk vanga a penalty hmuh chu pet turin Messi a rawn ding chhuak a, season hmasa Catalan club tana goal 48 khungtu pet hi Iceland keeper-in a dang. Messi hian ram leh club tan penalty a chhuih hnuhnung pasarih zinga pali ngawt a khung lo.

Messi chuan, "Thawnthu ziah danglam theihna hun a ni a, penalty kha chhuih lut ni ila chuan goal dang khung tur pawhin kawng a inhawn zui a beiseiawm, a goal lo kha a pawiin rilru a ti na hle.

"Hnehna nen a bul ṭan hi a ṭhain duhthusam a ni, inkhel thunun tak chunga point thum kan hmu lo kha a pawi a ni. Kan chak zo lo boruak hi kalsanin tunah chuan Croatia kan ngaihtuah a hun tawh," a ti.

Argentina hian an group match pahnihna atan Ningani zan dar 11:30 hian Croatia an tum leh ang.

Fak phu Iceland
World Cup khel zinga ram te ber Iceland hian Argentina an inhnehtawk pui a ni satliah bik lo a, South American ram hi an chaih buai fo.

A tir lama midfielder Birkir Bjarnason chuan hnai tak aṭangin goal zawnah a pet lo a, counter attack aṭangin an khingpui hi an nawr buai thei hle.

Mipui 350,710 vel chauh awmna ram hian 2016 Euro-ah khan an match hmasa berah Cristiano Ronaldo te ram Portugal chu 1-1 a inhnehtawk puiin, last 16-ah England an pet chhuak zui–a thlengtu France ngam lo mah se quarterfinal kha an tan sang tak a ni.

World Cup-ah pawh an match hmasa berah an tlawm lo a, beiseina nen hmalam an pan leh thei ang.

Iceland hian goal nawr leh a venhim kawngah huaisen taka Argentina an hmachhawn theih avangin point khat hmuh an phu a, June 22 zana Nigeria an hneh a nih ngat chuan, Euro 2016 ang bawk khan an dai ngai loh ram an dai chhunzawm zel lo ang tih a sawi theih loh.