Ronaldo, Ronaldo, Ronaldo

Spain an thiam rual a, Portugal-in Cristiano Ronaldo an nei thung. European champion Portugal-in captain Ronaldo hattrick hmangin 2010 World Cup champion La Roja nen 3-3 in an draw.

Zirtawpni zan inkhel hi tun World Cup khelh tawh china hmuhnawm bera chhal ngam a ni.

Group B inkhel dangah Morocco forward Aziz Bouhaddouz chuan hun pek belhah pawh minute nganaah an lamah a tauh lut a, Iran 1-0 in an chak. Table mawngphaha awm tura ngaih Asia aiawh Iran chu group hmahruaitu an ni.

De Gea leh Costa
Portugal star Ronaldo-a'n minute lina lekah penalty a hlawh chhuak nghal a, Spain keeper David de Gea-a'n a dang thei lo a, demna tur a awm lo.

Spain-in an chhanglet nghal a, minute 24-naah Diego Costa chuan Pepe a nghawk hnuah Portugal defender dang a nghak khawm te te a, Atletico Madrid striker hian a thiamna hmangin 'cool' taka a petna tur khawp insiam chawpin goal kilah a pet lut.

World Cup ṭan hmain khawvel keeper ṭha ber ang hiala chhal De Gea a mualpho a, Champions League final-a Liverpool keeper Loris Kariusang maiin a che chhia a, minute 44-naa Ronaldo ball pet chu ho takin a chhuah.

Second half-ah Spain thiam zia a lang a, Real Madrid star Isco, Barcelona duo Andres Iniesta leh Sergio Busquets, Manchester City playmaker David Silva leh Atletico Madrid midfielder Koke te ball inpe kual chu Portugal tan buaina a ni.

Minute 55-naah Costa-a'n a goal hnihna a khung a, mimal ropuina ni tawh loin team ropuina a ni tawh thung. Minute thum hnuah penalty chawitu Nacho chuan mawi zetin a volley goal bawk a, coach thar Fernando Hierro hoten hma an hruai chiah bawk.

Hliahkhuhtu Ronaldo
'Headline' siam thiam bik Ronaldo chuan minute 88-naah Gerard Pique lakah freekick a hlawh chhuak a. Portugal captain hian box pawn aṭangin goal kilah freekick hi goal kilah khungin De Gea a che hman lo. Portugal leh Spain te chu 3-3 in an inhnehtawk.

Fisht Stadium-ah Ronaldo a ropui ta ber a, Portugal captain hian De Gea tihsual bakah Costa thiam zia thlengin a hliah khuh a, hattrick siamtu Real Madrid forward an infak siak a, a ropui zia chu an ziah nasat ber a ni.

Portugal coach Fernando Santos chuan, "Cristiano Ronaldo hi chu a rilru a paukhauh a, a thiamna a sang a, a tumruhna vang hian khawvela player ṭha ber zinga mi a ni. Team ṭhaah a khelh avangin final pawh a khel tam tawh a, a thlir dan a dang avangin 3-2 a kan hnufual lai pawh khan team fuih phurtu a ni," tiin a fak.

Ronaldo hian a club leh ram tan a career-a hattrick 51-na a siam a, kumin World Cup-a hattrick hmasa ber leh history-a 51-na a ni bawk. Portugal captian hian Pele, Uwe Seeler leh Miroslav Klose te hnung zuiin World Cup inelna paliah a goal a khung a, a zawna inelna lian pariata (World Cup leh Euro C'ship) goal khung vek thei hmasa ber a ni bawk.

Lopetegui thlaktu Hierro
Spain-in Portugal an hmachhawn hma ni hnihah coach Julen Lopetegui an ban a, sporting director Fernando Hierro-a'n a thlak a. Real Madrid player hlui hnuaiah bul an ṭan ṭha tawk lo a, point khat chiah an hlawh chhuak.

La Roja coach Fernando Hierro chuan, "Ronaldo kan hmachhawn a nih chuan hetiang hi a thleng thei a, Ronaldo neih chu team tan vanneihna a ni. Ani nen hian inlaichinna ṭha tak kan nei a, amaherawhchu tuna ka player zinga mi tupawh hi la chhuak ila, Ronaldo nen hian thleng ka phal lo," tiin an khingpui player a fak tluantling duh lo.

Kum 50 mi Hierro hian keeper chesual De Gea chu a la rintawk reng thu a sawi bawk. Spain hian Nilaini zan dar 11:30 hian Iran an hmachhawn ang a, hemi ni vek hian Portugal leh Morocco te tlai dar 5:30-ah an inkhel ang.