Mizoramah U15 League awm dawn

MFA leh Tata Trusts ṭangkawp chuan July 28, 2018 aṭanga ṭan turin MFA Under 15 League a buatsaih dawn a, hei bakah hian MFA Under 15 Cup (knockout tournament) a buatsaih bawk ang.

Team 10 inelna tur a ni dawn a, team pakhat tur chu Tata Trusts Centre of Excellence team-te an ni ang.

A rei lo berah thla li tal daih turin he league hi duan a ni dawn a, India rama kum bithliah inelna changtluang ber zinga mi ni thei tura duan a ni ang.

Under 15 League-a team 10 awmte hi vawi hnih ṭheuh an inkhel kual chhuak ang a, a tawpah point hmu sang paliin semi final playoff an khel dawn.

MFA Under 15 League-a tel tur hian tehna (criteria) hrang hrang duan a ni a, he tehna tlin chinin a khelh theih dawn a ni.

MFA Under 15 League khel thei tur tehna hi vawiin chhun lamah MFA Office, City Park-ah June 18-ah lam theih a ni ang a, MFA Facebook page lamah tarlan a ni bawk ang. A tehnaa tling team pakua thlan chhuah an ni ang.

Under 15 team thar din duh tu tan pawh hun remchang hawn a ni a; nimahsela inelna hi rei tak kalpui tur a nih vangin ti tak tak chin tan chiah luhchilh ngam a ni ang.