England an ti 'mai mai' dawn lo

Zanin dar 11:30-ah England-in an World Cup match hmasa ber an khel dawn a, an hmachhawn tur hi Tunisia an ni.

Three Lions coach Gareth Southgate chuan, "Russia-ah khualzin ang maia nuam tawl tura kal ka ni lo a, ka theihna zawng zawng hlanin hna ka thawk dawn a ni," a ti a, a sang thei ang ber a naute hruai thlen a tum.

World Cup 1998-ah khan England hian group stage-ah tho Tunisia an lo hmachhawn tawh a, Three Lions hian 2-0 a hnehna changin player zingah Southgate a tel!

Player a nih laia a hneh tawh hnu hmachhawn turin Southgate a inbuatsaih a, England coach chuan, "Player ka nihna ang aiin tunah chuan ka mawhphurhna a sang zawk," a ti a, a kutah thui takin result a innghat tih a sawi.

Churchill aiah Duncan

2002 World Cup-ah khan England-in quarterfinal an lut a, first half-ah Brazil nen 1-1 a an inhnehtawk hnuin 2-1 in an tlawm zui a, hetih hunlai squad-ah hian Southgate a tel.

A hunlaia Southgate thusawi lar tak chu, "Chawlhlawk lai khan min fuih phur turin Winston Churchill kan mamawh a, mahse kan neih chu Iain Duncan Smith a ni si," tih a ni a, a hunlaia coach Sven-Goran Eriksson a sawisel a, British politician inthlau tak pahnih hmangin tehkhin thu a sawi.

Tunah Southgate-a hun a thleng a, a ṭawngkamin a vuak let loh nana hnathawh tur a neih chu a hniam berah semifinal tal luh a ni ang - a hna hmasaah Tunisia hneh phawt a ngai.

Southgate chuan, "Ram tana feh chhuak kan nih chuan kan ram pumpui beiseina kan phur ṭhin," a ti a, "Pressure a awm lo a tih theih loh a, mahse chu pressure chu kan in hneh tir tur a ni lo," tiin a naute chu hahdam taka inkhel turin a fuih nghal.

Thawnthu thar

England senior team-in kum 52 zet chu major tournament-ah nomawi an chawi tawh lo a, hetihlai hian Under 17 leh Under 20 World Cup-ah nikum khan an champion ve ve thung - naupang zawkin an u te entawn tur an hnutchhiah.

Tun hnaia England major tournament result a chhuanawm lo - Euro 2016-ah last 16 lut mah se Iceland-in an pet chhuak a, 2014 World Cup-ah khan point khat chauh hmu chungin group stage aṭangin an tla bawk.

Three Lions-in qualifying round-ah tlawm hmel hmu loin World Cup an inpetkai a, hei vang hian an chungah beiseina a sang a, an sulhnu ropui lo tak hi an thaireh theih mipuiin an beisei.

Hetihlai hian Southgate erawh a ṭawng fimkhur thung. England coach chuan, "Qualifier leh tournament takah team an inthlau a khaikhin chi a ni lo. Major tournament-ah kan vanduai fo, khawvela team ṭha ber ber an awm tawh vang a ni - an level kan la phak lo a ni mahna," a ti!

England leh 3-4-3?

Southgate-a'n England khelh tir dan ṭhang a nei a, chu chu 3-4-3 formation a ni. English coach enkawlna hnuaiah tlarhnung laiah defender pathum an awm ṭhin a, wing back pahnih chu tlarhnung leh hma lam pui turin an inring ṭhin.

Player a nih laia England tana vawi 57 inlan thei defender hian a duh ang taka khel turin player chhawr tur a nei a, hei tak hi pressure sanna tur erawh a ni - Harry Kane, Jordan Henderson, Raheem Sterling, Marcus Rashford leh Dele Alli te awmna team hi champion tur ema beisei ngam chi ni lo mah se Tunisia laka chak lo tur erawh chuan dah chi an ni lo ang.

Southgate-a'n zanina inkhel bul ṭan tur a thlang fel tawh. England coach chuan, "Tunisia hmachhawn tur chu an inhre vek tawh," a ti a, player rilru a inpeih at nan leh an phawk lek loh nana thutlukna hrilh hma a nih thu a sawi.

Goalkeeper Jordan Pickford chuan, "Kan theihna leh thinlung zawng zawng he ram tan kan hlan dawn a, kan inpeih tawh a ni," tiin Tunisia hmachhawn an chak tawh thu a sawi a, Ashley Young chuan, "Hnehna chang chunga bul ṭan kan duh," a ti bawk - zaninah a chiang dawn e.

Hei le Tunisia

England squad ṭhatzia kan sawi a, team inlungrual leh thawk ho ṭha tak an ni bawk - hei avang ringawta Tunisia thaibo erawh thil harsa a ni a, he team hian England barakhaih turin theihna an nei.

Tunisia hian Russia an pan hmaa an friendly match hnuhnung pathumah team 'lian' tia chhal theih vawi hnih an hmachhawn a, Portugal nen 2-2 a an inhnehtawk hnuah Spain chu 0-1 in an ngam lo.

Eagles of Carthage (Tunisia sawina) midfielder Ellyes Skhiri chuan, "Portugal leh Spain kan hmachhawn hnu khan team lian kan hmachhawn dawna pressure kan neih zawng zawng kha min paih bo sak a ni," a ti a, kum 40 chuang World Cup-a an chak tawh loh record chu thaibo an tum thu a sawi bawk.

Tunisia tana thu lawmawm chu Wahbi Khazri a dam tawh - Sunderland striker hian English football a hrechiang a, Three Lions lakah a pawimawh ang.