Champion tum Belgium fiahna hmasa

Belgium-in tun World Cup-ah champion an tum ngam a, fiahna an hmachhawn hmasak ber tur chu Panama a ni - zanin dar 8:30-ah an inkhel ang.

Red Devils-in kil tinah player langsar an hun theih laiin Panama chhuan tur erawh thawhhona ṭha a ni - he ram hian a vawi khat nan World Cup an khel dawn a, an khingpuiin champion an tum laiin anni tan erawh Russia pan theih ringawt pawh hi a ropui.

Belgium coach Roberto Martinez pawhin a naute theihna a hrechiang a, team an nihna anga an khel chhuak thei a nih phawt chuan an hmaah result lawmawm takin a hmuah thu a sawi.

Everton boss hlui chuan, "September 2016-a Spain kan hneh loh hnuah kha chuan match 16 chhung kan tlawm tawh lo. Player tinte theihna zawng zawng hi en ila, chu chu team anga kan parchhuah tir theih phawt chuan result ropui takin min hmuak a ni," a ti.

World Cup team atana Radja Nainggolan ko lotu coach hian player a nei ṭha tih a chiang a, Thibaut Courtois, Toby Alderweireld, Jan Vertonghen, Kevin De Bruyne, Romelu Lukaku, Eden Hazard leh Dries Mertens te awmna team hi Belgium 'golden generation' tih hial an ni.

Martinez chuan a naute a rintawk thu sawi lang nghalin, "He team hi rei tak lo khel ho tawh an ni a, chu chu 2008 aṭang khan i keu let thei ang. Beijing Olympic leh major tournament pahnih an paltlang ho a, world no.1 team an ni ho a, Europe aṭanga Russia pan tura inpetkai hmasa ber an ni bawk. Heng zawng zawng hian a huhoin hmalam min pan tir zel a ni," tiin an inhriat chian tawhna chuan thui tak a hruai theih thu a sawi.

Hetihlai hian Belgium tlarhnunga pawimawh pahnih Thomas Vermaelen leh Vincent Kompany te an dam hman lo a, Panama an hmachhawn dawn lo.

Panama forward Abdiel Arroyo chuan, "Belgian player-te hi eng league-ah nge an khelh kan hria a, an thiamna pawh kan hrechiang - engkim kan zir chiang vek. Theihtawp kan chhuah ang a, counter attack hmangin nawr let kan tum dawn a ni," tiin inbuatsaihna an neih ṭhat thu a sawi.