Beisei phak lo France-in Australia hneh hram

Player langsar rual awm­khawmna France-in World Cup-a an match hmasa berah 2-1 in Australia an hneh hram a, beisei phak lo chunga chak result hlawhchhuah hi 'champion zia' tia an sawi ṭhin kha a ni.

Australia hian an goal hmasa ber khung turin video assistant referee (VAR) puihna an mamawh a, VAR hmanga an penalty hmuh chu Antoine Griezmann chuan hmahruaina goal ni turin a khung.

Socceroos-in minute li hnu lawkah penalty hlawh chhuak ve nghalin Mile Jedinak hmangin an si phurh an sut a, a tawp thleng erawh an ṭang zo lo - Paul Pogba chuan hun tawp nan minute 10 chiah a awm tawh tihah France goal hnihna a khung a, a chhanletna nei lo Australia an tlawm.

Group C inkhel dangah Den­mark-in hnehna an chang bawk a, Yussuf Poulsen goal khung hmangin Peru chu 1-0 in an hneh.

Beisei phak lo

Inkhelh ṭan hmain France tlar­hmain sawi an hlawh a, Ousmane Dembele, Griezmann leh Kylian Mbappe inkawp tur chu football khawvelin titi tui bera a neih a ni.

Mahse, Australia lakah Griezmann-a'n beisei a phak lo a, major tournament pahnih a hmachhawn tawha goal sarih leh assist pahnih neitu ang kha a ni lo - France in thlen thui an duh chuan Atletico Madrid forward hian insiamṭhat a mamawh ang.

Kum 19 leh thla ruk mi lek nichunga France tana major tournament-a inlan thei naupang ber record siamtu Mbappe chu France tlarhmaa hmuhnawm ber a ni a, Dembele lah champion tum team meuh tana rinrawl turin a la 'nem' deuh niin a lang.

Griezmann thlakin Olivier Giroud dah luh ni mah se Chelsea striker pawhin ṭum dang a phak lo a, Pogba goal khung tur a siamsak miau avangin 'bo' tawp erawh a ni lo.

Fak phu Australia

Australia tlarhnung an inrem­phui ṭha a, France tlarhma hlauh­awm rual an hawihai a ni ber - team pahnih in 'draw' se result 'fair' tak tiin a sawi theih chauh ang.

Midfield-ah Australia tan captain Jedinak leh Huddersfield Town midfielder Aaron Mooy te an hmuhnawm a, player pahnih hi France tlarhmain an midfield aṭanga 'supply' an hmuh ṭhat tawk loh chhanah puh theih tak an ni.

Australia hian 2006-ah chiah World Cup last 16 an paltlang a, France laka an khelh dan anga an khel chhunzawm thei a nih phawt chuan Peru leh Denmark lakah an ngaihtuahawm lo ang.

Bert van Marwijk chu fak phu a ni - Ange Postecoglou-a'n Australia enkawl a bansan thut hnuah Dutch coach hian he team hi a enkawl a, World Cup hmain friendly match pali chiah a khelhpui hman.

Vanduai Peru

Peru-in kum 1982 hnua World Cup an khelh leh hmasak berah chak phu tak chungin hnehna an chang zo lo a, Denmark lakah 0-1 in an tlawm.

South American team hian hmahruaina remchang pawh an nei hmasa zawk. VAR thutlukna hmanga penalty pek an nih hnuah an hun ṭha neih erawh an chhawr thei lo a, Christian Cueva chuan goal chung lamah a thlawh luah!

Peru-in an hun neih an thlir let chuan an ui ve khawp ang - Denmark goalkeeper Kasper Schmeichel chuan Edison Flores leh Jefferson Farfan te hun ṭha neih ṭha zetin a dan sak a, Swiss Court-in hrem a nihna a hlihsak hnua inlan Paolo Guerrero chuan uiawm zetin a kheng lut lo bawk.

Denmark coach Age Hareide chuan, "Peru kha an si phurh sut tumin an thawkrim em em a, kan goakeeper Kasper khan a khel ṭha em em bawk," tiin goalkeeper a fak nghal.