World Cup official match ball
Adidas Telstar 18
FIFA World Cup 2018 official match ball atan Adidas Telstar 18 hman a ni a, FIFA thawhpui Adidas-in an duh ang taka duangin Sialkot, Pakistan-a hmunpui nei Forward Sports chuan an ti chhuak.
Telstar tih hi communications satellites hming aṭanga lak a ni a, kum 1970-a FIFA-in World Cup official ball a neih hmasak ber khan adidas chuan Telstar hi a lo siam tawh - kuminah hman a ni leh dawn ta a ni.
November 9, 2017 khan Telstar 18 hi Moscow khawpuiah tlangzarh a ni a, World Cup Best Player ni lai Lionel Messi chuan vantlang hmuh theih turin a tlangzarh. Telstar tih hi ‘television’ leh ‘star’ tih ṭawngkam belhkhawm a ni.
Adidas chuan ball-ah hian near-field communication (NFC) chip an dah a, hei hian player ball petna kawngah pui dawn lo mah se he ball leitute erawh chuan smartphone leh chip hi an thlun zawm thei ang a, chumi kaltlang chuan ball chungchang leh tun World Cup chungchang te hi an en thei dawn a ni.
1930: Tiento (first half)
T-model (second half)
World Cup hmasa ber final-ah ball pahnih hman a ni. First half-ah Argentina siam Tiento hman a ni a, 2-1 in hma an hruai. Second half-ah Uruguay siam T-Model (Tiento aiin a ritin a lian zawk) hman ni ve leh thungin Uruguay hian 4-2 in hnehna an chang.
1934: Federale 102
Italy-in World Cup a thleng a, Benito Mussolini dictatorship rorelna hnuaia awm Italy sorkar chuan he ball hi an siam.
1938: Allen
Paris khawpuia hmunpui nei Allen chuan leather hmangin an siam a, panel 13 a nei.
1950: Duplo T
Superball kut chhuak niin World Cup-a a ṭhuina lang lo ball hman hmasak ber a ni a, syringe valve awm hmasa ber a ni bawk.
1954: Swiss World Champion
Kost Sport, Basel-in an siam niin panel 18 nei ball hmasa ber a ni.
1958: Top Star
Sweden lam chhuak a ni a, company hrang hrangin an ball siam an thehluh hnuah company 102 kut chhuak zingah top star hi thlan a ni.
1962: Crack Top Star
Chilean company Custodio Zamora kut chhuak ball hi World Cup ball turin pawm vek ni mah se Europe ram ten an hmang ṭha duh lo a, ball dang an hmang nual!
1966: Challenge 4-star
Slazenger kut chhuak niin the Football Association headquarters, Soho Square, London-ah thlan a ni.
1970: Telstar
Adidas kut chhuak niin, panel 32 black & white-ah TV aṭanga lo entute tana hmuh a awlsam zawk nan ṭhen a ni.
1974: Telstar Durlast
Polyurethane hmanga thuam niin tui huh laka him tura siam a ni.
1978: Tango
World Cup thlengtu Argentina hnam lam chi khat ‘tango’ zulzuia a hming hi phuah a ni a, khawvela ball lar ber pawl ni zuiin an hralh hnem hle.
1982: Tango Espana
World Cup-a leather ball hman hnuhnung ber a ni a, adidas logo ‘trefoil’ (hnah pathum) tihlan a ni.
1986: Azteca
Kut hmanga ṭhui, World Cup-a ball hman hmasak ber niin adidas kut chhuak a ni.
1990: Etrusco Unico
Kum 1986-a mi nen danglamna a tam lo a, Azteca ‘ṭha zawk’ tih chu hrilhfiah dan awlsam a ni.
1994: Questra
Adidas chuan polystyrene foam hmangin ball pawn lam an tuam a, hei hian pet a ti nuam a, control a ti nuam a, a speed a chak bawk.
1998: Tricolore
Adidas chuan World Cup-a a vawi khat nan rawng chi hrang hranga chei ball an siam.
2002: Fevernova
Adidas chuan tun hma zawnga ball aia pet nuam tur tiin an siam a, a sawt duh lutuk avangin sawisel a hlawh thung.
2006: Teamgeist, Teamgeist Berlin
Adidas kut chhuak Teamgeist-ah hian match tinah ball hrang ṭheuh hman a ni a, stadium, inkhelhni leh inkhel tur ramte hming a chuang zel a, final-ah chuan gold rawnga chei Teamgeist Berlin hman a ni.
2010: Jabulani, Jo’bulani
Jabulani ball hi boruak sanga a awmin a ball kal dan hriatthiam a harsa a, hei vang hian adidas-in sawisel an tawk nasa. Jo’bulani chu final match-ah hman a ni.
2014: Brazuca, Brazuca Final Rio
Fan-ten FIFA World Cup ball hming an phuah hmasak ber a ni a, Bundesliga leh Major League Soccer-ah te hman chhunzawm a ni hial.