World Cup khel tur Argentina leh Messi

Lionel Messi hoin Argentina chuan Qatar World Cup 2022 an khel dawn tih a chiang ta. La Albiceleste hi Brazil nen 0-0 in an inhnehtawk a, chak zo lo mah se inkhel dangah Chile leh Uruguay te an tlawm avangin a sang pali zingah an tel chiang.

South America aṭangin Brazil leh Argentina te hian tlawm nei loin Qatar ticket an nei thei a, ram pahnih dangin an hnung an la zui thei dawn. Pangana tan chuan playoff khelh a ngai ang, pangana hian inter-confederation playoff erawh an paltlang leh ngei a rinawm.

A goal lo
Nimin zing inkhelah Argentina tan Ballon d'Or vawi ruk dawng tawh Messi-a'n inkhel bul a ṭan thei tawh a, world champion vawi nga ni tawh Brazil lamin hliam vangin Neymar an chhawr thei lo thung, an tlin chian tawh avangin coach Tite tan a pawi thui hran lo.

Mualneitu Argentina lamin ball chang tam hret mah se goal hlauhawm neih an harsat, team pahnih hian goal hlauhawm sawi tur an ngah lo. Second half-ah Manchester United midfielder Fred chuan crossbar a tih per a, a vanduai.

Goal a awm loh avangin Raphinha chunga thil thleng kha a langsar ber zinga mi a ni. Leeds United forward hi Nicolas Otemendi-a'n a nghawk a, thisen a chhuak hial - chawlhlawk laiin hmun ngaah chilh a ngai hial a ni.

Mahse, Uruguayan referee Andres Cunha leh assistant referee ten an hmu miau loh avangin Argentine defender hian hremna a pumpelh! Brazil coach Tite chuan, "Otamendi chet dan an hmu lo kha chu a mak hle," tiin Manchester City defender hlui chu hnawh chhuah turah a ngai.

Hello Qatar
Argentina hian a zawna a vawi 13 nan World Cup an khel dawn a, an captain Messi tan World Cup vawi ngana a ni dawn bawk. Messi hi kum 34 mi a nih tawh avangin football inelna lian ber a hmachhawn hnuhnung ber tur a nih tawh a rinawm.

Messi chuan, "Ball a kal rangin mitin kha an che rang em em a, ka tan chuan a la awlsam lo," a ti. Hliam vangin tun hnaiah a inkhel tam lo a, an match hmasa zawkah pawh minute 15 chauh a inlan, tunah chuan minute 90 a inkhel leh thei tawh.

La Albiceleste coach Lionel Scaloni chuan, "Kan hun tawn hi a ropui. Copa America nomawi kan chawi a, chumi hnuah hneh loh tawng loin World Cup ticket kan nei leh thei tawh," a ti a, tun hnaia an ram team khelh dan chu a chhuan thu a sawi.

Tun hnaiah match 27 chhung chu tlawm loin an kaltluang ta, vawi 17 hnehna changin ṭum 10 dang chu an khingpuite nen an inhnehtawk. World Cup qualifier bikah hian goal ruk chuah an la chhuah a, anni aia chhuah tlem chu Brazil (4 goals) chauh an ni.

Uruguay an tlawm
World champion vawi hnih ni tawh Uruguay chu World Cup khel lo thut thei dinhmunah an ding mek. Luis Suarez awmna ram hi Bolivia mualah 3-0 ngawtin an tlawm, mualneitu hi an player Carmelo Algaranez chu minute 74-naah hnawh chhuah a ni.

Player kim loa khel lakah Uruguay an mualpho a ni satliah lo, player tam zawk an nih hnuah goal khat an chhuah belh. Uruguay hi ram 10 inel zingah pasarihna an ni mek - World Cup khel phak china awm Colombia an phak lohna chu point khat chauh a ni thung.

Uruguay coach Oscar Tabarez chuan, "Journalist zingah ka hna aṭangin ka bang dawn nge dawn lo tih min zawt an awm, a mak ka ti zawk hle. Professional ka ni a, hun tiam chin neiin contract pawh ka ziak, hei hian in hriat duh chu a hrilh thei ang che u," a ti, ban a la tum lo hle.

South America ram te hian qualifier match khelh hmabak match li an la nei a, an dinhmun a la inthlak kual viau thei. Uruguay bakah hian Alexis Sanchez leh Arturo Vidal te awmna Chile chu Qatar pan lo thei zinga mi an la ni, inelna a la ngaihnawm zel dawn.