India tan a khelh leh ngei ka tum - Lianzuala

Indian Super League season riatna chu November 19, Zirtawpni zan aṭangin khelh ṭan a ni dawn. Chennaiyin FC forward Lallianzuala Chhangte chuan India tana a khelh leh ngei theih nan ṭha taka season ṭha tak hman a tum thu Vanglaini a hrilh.

Kum 24 mi Lianzuala chuan, "Season liam ta kha chuan kar thum vel lek inpuahchahna hun a awm a, tun season-ah erawh kar riat vel kan neih avangin inelna hmachhawn tur pawhin kan inpeih thawh hle. Hliam nei chungin training ka zawm a, tunah chuan ka dam ṭha tawh," tiin a sawi.

Lianzuala hian season liam ta khan match 20-ah goal li a khung a, ISL-ah hian season nga chhungin 19 a khung tawh. Lunglei tlangval chuan, "Tun season tawp rual hian ka contract a tawp dawn a, target pawh ka insiam sang hle. Champion theihna zawng zawnga champion ka duh a, mimal ang pawhin record ṭha zawk neih ka duh. Ka kum a la naupang a, India aiawhin pawhin la khelh leh ngei ka tum a ni," tiin Vanglaini a hrilh.

Mizo tlangval hian India tan match 13 a khel tawh a, goal li a khung tawh. Lianzuala hian hliam a neih avangin SAFF Championships-a champion team-ah khan a tel lo a, India aiawha khel pha leh tur chuan ISL-a a chet ṭhat hi a ṭul.

Chennaiyin-ah Mizo pahnih an awm a, Lianzuala bakah left wing back Jerry Lalrinzuala te an awm. Lianzuala chuan, "Football hi Pathian tana kan rawngbawl ve theihna a ni a, rawngbawlna ṭha kan neih theih nan hrisel ṭha kan mamawh. Hrisel ṭha kan neih theih nan Mizo mipuite ṭawngṭaipuina kan ngen e," tiin Vanglaini a hrilh.

November 23, Thawhlehni zan dar 7:30 hian tun season atana ISL match hmasa berah Chennaiyin FC hian Hyderabad an hmachhawn ang.