Netherlands-in World Cup an khel dawn

World Cup 2018 an khelh loh hnuah Netherlands chu an awmna tur takah an kir ve leh ta a, nakkum World Cup khel turin ticket an nei fel ta.

Netherlands hian qualifier-a an match hnuhnung berah Norway chu 2-0 in an hneh a, Steven Bergwijn leh Memphis Depay ten goal khat ve ve an khung.

Norway erawh an tlawm avangin World Cup khelh an beiseina chu a thamral a, Qatar-ah European striker 'hot' ber pawl Erling Braut Haaland kan hmu dawn lo tihna a ni.

Group G inkhel dangah Turkey chuan 2-1 in Montenegro an hneh thung a, playoff hmanga World Cup khelh beiseina neih chhunzawm turin pahnihna dinhmun an luah.

Oranje an chak
Netherlands khelmualah inkhel a hmuhnawm tawk lo a, team pahnih an fimkhur avangin an innawr tak tak ngam lo - Norway tan chuan hliam vanga Haaland an chhawr theih loh chu chhuanlam theih a ni.

Norway-in tlarhnung an veng ṭha a, mahse, team ṭha zawk Netherlands laka inven reng erawh thil harsa a ni. Hun tawp nan minute ruk chauh a awm tawh tihah Bergwijn chuan goal a rawn khung a, inkhel boruak dul tak a nung sawt.

International break-ah Tottenham Hotspur player-te an che ṭha a, Spurs coach thar Antonio Conte tan a phurawm ang - kartawpah Leeds United an hmachhawn dawn.

Harry Kane-a'n England tan match hnihah hattrick a siam ve ve a, South Korea tan Son Heung-min chu inkhel khaidingtu a ni a, Bergwijn-a'n Netherlands tan a khung ve leh ta.

A hming Depay
Netherlands-in goal khat an chakpui mai dawn niin a lang hman a, mahse, Depay-a'n a lo duhtawk ve lo - hun pek belh minute khatnaah goal a rawn khung ve leh a, Norway tan 'comeback' ngaihna a awm tawh lo.

Barcelona forward Depay hian kuminah ram tan match 16 khelin goal 17 a khung tling der tawh a, Netherlands tan chuan kum 27 mi forward dam ṭhat hi a pawimawh zel dawn.

Depay hi Kane nen Europe khawmualpui pual World Cup qualifier-a goal khung hnem an ni a, goal 12 ve ve an khung - a nep lo hle.

Hetihrual hian Euro zawhah Netherlands enkawl tura lo kir Louis van Gaal lam hmaih a thiang lo a, Manchester United coach hlui hian Dutch team hi match sarih kaihruaiin tlawm a nei lo - vawi nga an chak a, vawi hnih an draw.

Turkey beiseina
Montenegro khelmualah playoff beiseina nei turin Turkey-in chak an mamawh a, an mamawh ang result an hmu a, 2-1 in an chak.

Thawhlehni zan inkhelah rin loh takin Montenegro lamin goal an khung hmasa a, Israeli Premier League club Bnei Yehuda striker Fatos Beciraj chuan minute thumna lekah goal hmahruai a khung.

Mahse, Turkey-in World Cup khelh loh an duh lo a, an tumah an chiang - minute 22-naah Galatasaray winger Kerem Aktürkoglu chuan si phurh sutna goal a khung a, an la duhtawk lo.

Minute 60-naah Dutch club Feyenoord midfielder Orkun Kökçü chuan goal khat a khung ve leh a, hun tawp thlenga goal dang lut loin 2-1 in Turkey an chak a, World Cup playoff an khel dawn.