FIFA World Cup-ah Tute nge tling a, tuten nge Playoff khel dawn?

FIFA World Cup 2022 ṭan nan kum khat bawr vel a la awm a, Qatar zin tur ram pawh a hriat ṭan. Inelna thlengtu Qatar leh Europe ram 10 bakah South America ram ṭha pahnih Brazil leh Argentina te an tling tawh bawk.

World Cup-a quota ngah ber Europe-in playoff hmangin hmunruak pathum a la zawng dawn. Playoff khel turte hi ram 12 an ni a, Cristiano Ronaldo telna Portugal leh European champion Italy te an la awm avangin boruak a sang dawn.

Khawvela inelna ngaihhlut ber FIFA World Cup-ah hian ram 32 an khel ṭhin a, FIFA hnuaia khawmualpui hrang hrangten quota an nei vek. World Cup-a sulhnu ṭha ber Europe-in quota 13 an nei a, ram 55 zet an awm avangin tel phak hi a la har tho.

Africa-ah ram 54 an awm a, quota panga an nei. Confederation of North, Central American and Caribbean Association Football (CONCACAF)-ah ram 34 an awm a, quota 3.5 an nei a, hmunruak pakhat hi playoff hmanga an zawn a ngai.

Asia-ah ram 46 an awm a, Qatar chu inelna thlengtu an nih avangin an tling nghal. Ram 45-in World Cup khel tur an zawng a, quota 4.5 a la awm. South America (CONMEBOL)-ah ram 10 chauh an awm a, quota 4.5 an nei pha. Brazil, Argentina, Chile, Uruguay te an awm miau avangin an ram tlem ngaihtuaha quota an ngah hi a mak lo.

Oceania-ah ram 11 an awm a, Asia hnuaiah Australia an beh tak avangin New Zealand chiah ram ṭha pangngaia sawi theih an ni ta. Anmahni pual pawhin quota an nei lo a, Oceania-a che ṭha ber pawhin World Cup khel tur chuan playoff an khelh phawt a ṭul.

Playoff-ah hian hmun ruak pahnih awmin Asia, Africa, North America leh Oceania ten ram khat ṭheuh an thawh dawn a, June 2022-ah khelh a ni ang. Ram pali te hi tie draw hmangin a intum tur pawh a ni ang a, double legged playoff hmangin World Cup khel tur an zawng ang.