Playoff-ah Portugal leh Italy te an hmachhawn thei!

Europe aṭangin ram 10 - Germany, Denmark, France, Belgium, Croatia, Spain, Serbia, England, Switzerland leh Netherlands te FIFA World Cup 2022 khel turin an tling tawh. Playoff khel tur zingah European champion Italy, Cristiano Ronaldo telna Portugal leh Robert Lewandowski telna Poland te an la tel a, Erling Haaland-a telna ram Norway phei chuan beisei an nei tawh lo.

Playoff khel tur hian qualifier-a group tina pahnihna ṭheuh an tling a, chungte chu Portugal, Scotland, Italy, Russia, Sweden, Wales, Turkey, Poland, North Macedonia leh Ukraine te an ni.

World Cup khel tur zawnnaah hian ram ṭha pahnih Portugal leh Italy te an la inhmachhawn thei a, hemi a nih avang hian nakkum March thlaa khelh tur hi a ngaihnawm dawn. November 26, Zirtawpni zan dar 9:30 hian Zurich, Switzerland-ah playoff-a intum tur pawh a ni dawn a, hriat a châkawm tawh hle.

Nations League Quota
Ram 12-in playoff hi an khelh dawn avangin hmunruak pahnih hi Nations League aṭangin an tlang a, Austria leh Czech Republic te an tling. Nations League-a mahni group ṭheuha pakhatna chu an chet ṭhat dan indawtin an rem a; a indawt dan chu France, Spain, Italy, Belgium, Wales, Austria, Czech Republic, Hungary, Slovenia, Montenegro, Albania, Armenia, Gibraltar leh Faroe Islands te a ni.

League A khel pha chin France, Spain, Italy leh Belgium te chu qualifier hmangin an tling a, League B-a che ṭha ber Wales pawh qualifier hmangin an tling. Qualifier-a tling pha lo Austria leh Czech Republic ten Nations League hmangin quota pahnih chu an hnawh khat a, an hnuaia ram awmte tan beisei a awm tawh lo.

Playoff chu
Playoff khel tur ram 12 zinga paruk hi seeded an ni a, seeded team-te hi semifinal-ah an inhmachhawn thei lo. Amaherawhchu seeded team-te hi final-ah an inhmachhawn theih tho avangin ram ṭha tan pawh World Cup khelh loh theih a ni.

Qualifier-a an chet ṭhat dan a zirin seeded hi siam a ni a, group khata ram panga awmna group chu an point hmuh ang kha en sak vek an ni. Chutihrualin group khata ram paruk awmna chu group mawngphaha awm team nena an result lak tel an ni lo thung. Nations League aṭanga tling pahnih hi seeded an ni thei lo bawk.

Tichuan seeded team chu Portugal, Scotland, Italy, Russia, Sweden leh Wales te an ni a, seeded ni pha lote chu Turkey, Poland, North Macedonia, Ukraine, Austria leh Czech Republic te an ni. Ram leh ram inhalna avangin Russia leh Ukraine te hi pawh kawp theih an ni lo.

Hmunruak pathum a awm avangin Path A, Path B leh Path C a awm dawn. Path A-ah hian team pali an awm dawn a, semifinal-ah seeded team leh unseeded team inkhelhna match hnih a awm dawn tihna a ni. Chutiang bawkin Path B leh Path C-ah pawh hian team li ve ve an awm dawn a, Path tinah hian World Cup khel tur zawnna final a awm leh ang.

Playoff hi nakkum March 24-ah semifinal khelh a ni ang a, final hi March 29-ah khelh a ni dawn.

Portugal vs Italy
Tie draw neih hma chu intum tur a hriat theih loh a, chutihrualin ram ṭha pahnih Portugal leh Italy te hi an inhmachhawn thei tih erawh hriat a ṭha. Ronaldo telna Portugal leh European champion Italy te hi seeded ni mah se final-ah an la inhmachhawn thei tho a, Path khata an awm kawp a nih chuan qualifier khelh laia champion tur rinkai tel tur team pakhat chuan World Cup an khel dawn lo tihna a ni thei ang.

Italy manager Roberto Mancini chuan playoff hmanga World Cup an tlin tho tur thu leh Qatar-a an champion hial theih thu a sawi. Amaherawhchu Azzurri hi Portugal, Poland leh Czech Republic te nen Path khatah an awm ho a nih ngat chuan World Cup champion chu sawi loh, Qatar zin theihna ticket pawh neih a harsa ang.