Japan chak mah se Australia chak zo lo
Europe leh South America lamah World Cup khel tur a chiang chho ṭan a, Asia lam pawhin a hmawr an bawk chho ṭan ve mek bawk.
Australia-in 1-1 a China an inhneh-tawkpui laiin group B-a an elpui Japan chuan 1-0 in Oman an hneh thung a, pahnihnaah Samurai Blue hian an lehthal - a la ngaihnawm dawn chauh.
Group A-ah South Korea chuan 3-0 in Iraq an hneh a, an elpui Iran chuan 3-0 in Syria an hneh ve bawk - United Arab Emirates pawhin an beiseina an la chhem nung ve hram hram a, 1-0 in Lebanon an hneh.
Hetihrual hian UAE hian group A pahnihna South Korea chu khelh zat inangah point riatin an phak lo mek a, thil mak a thleng a nih loh chuan Iran leh South Korea hi tling tawh ang hiala sawi ngam an ni.
A pawi
Group B-ah inum boruak a sosang a, boruak san vanglai takin Australia chuan 1-1 in China an inhnehtawkpui. Socceroos (Australia sawina) tan Mitchell Duke chuan minute 38-naah goal hmahruai a khung a, Australia an chak mai rinna a lian hman.
Mahse, minute 70-naah Australia an vanduai a, Xu Xin-a freekick aṭanga ball kal chuan James Jeggo-a kut a per a, referee-in video assistant referee hmanga a ennawn hnuah penalty spot a kawk.
China tan Espanyol forward Wu Lei a lo pen chhuak a, Chinese Super League club Shanghai SIPG aṭanga hming chher forward hian harsatna nei loin goal-ah a chantir a, an si phurh sutin an inhnehtawk.
Tun international break-ah Australia hian match hnih an khelh aṭangin point hnih chiah an hmu a, October khan an elpui Japan an lo ngam loh tawh bawk avangin pathumnaah an tla. Hmabak match li erawh an la nei a, an elpui Japan leh Saudi Arabia an la hmachhawn dawn bawk avangin an kutah engkim a la innghat tiin a sawi theih.
Japan tan beiseina
Australia an chak zawh loh laiin Japan erawhin khualmualah harsatna nei loin Oman chu 1-0 in an hneh a, Junya Ito chuan inkhela goal awmchhun hi a khung - mualneitu lamin a chhanletna tur an nei thei lo.
Junya Ito tan chuan tun international break hi chhinchhiahtlak a ni - match hmasa zawka 1-0 a Vietnam an hneh ṭum pawhin goal awmchhun a lo khung tawh a, Belgian club Genk striker-in international break a hmang ṭha hle.
Japan-in hnehna an chan avangin an chunga awm Australia an tlan pel a, table-ah pahnihna an nih tak avangin World Cup khel thei dinhmunah an ding mek - an kutah engkim a innghat ta.
Samurai Blue hi Saudi Arabia laka 1-0 a an tlawm zuk hnua qualifier match thum an khelhah an chak vek a, Japan coach Hajime Moriyasu chuan, "Pahnihna kan ni ta a, mahse, kan fimkhur reng loh chuan la chesual thei kan ni," a ti a, lawm a la hun lo tih a hai lo.
South Korea chak
November international break-a match hnih an khelha an vawi hnih chakna ni turin South Korea chuan 3-0 in Iraq an sawp a, Lee Jae-sung, Son Heung-min (penalty) leh Jeong Woo-yeong te chuan goal khat ṭheuh an khung.
South Korea tan ṭum dang ang bawkin Son chu player langsar a ni a, Tottenham Hotspur forward through ball ṭha zet aṭangin Lee Yong chuan Jae-Sung tan a siamsak a, thla hmasaa 1-1 a Iran nen an inhnehtawk ṭuma a chetsual avanga sawisel hlawh Jae-Sung hian amah sawiseltute ka hup nan goal-ah a chantir.
Taegeuk Warriors (South Korea sawina) tan Son hian minute 74-naah penalty hmangin an goal hnihna a khung a, hei pawh ama thawhrah bawk a ni. Spurs forward hian forward Cho Gue-sung tan a siamsak a, Cho hian penalty a hlawh chhuak.
Son-a'n harsatna nei loin goal-ah a chantir a, goal thumna luh nan pawh Son bawk kan hmu nawn - mawi zeta Iraq tlarhnung a lam khum hnuah Hwang Hee-chan tan a siamsak a, Wolverhampton Wanderers forward hian Jeong tan a siamsak ve leh a, SC Freiburg attacking midfielder hian ram tana a goal hmasa ber ni turin goal-ah a lo chantir.
Chak nuamsa
Group A-a team inel ber chu South Korea leh Iran an ni a, team pahnih hi he group aṭang hian World Cup khel tura an tlin ngei pawh a rinawm - Korea chak zanah Iran-in goal thum vek an khung a, 3-0 in Syria an hneh.
Iran tan Sardar Azmoun, Ehsan Hajsafi leh Ali Gholizadeh ten goal khat ṭheuh an khung a, Syria-in a chhanletna tur goal an neih loh avangin Iran an chak chiang.
Syria tan goalkeeper Khalid Al Haji chet ṭhat zan a ni a, che ṭha lo ngat se goal tam zawk chhuah thei an ni - Lebanon laka chakna goal khungtu Ahmad Nourollahi chuan goal khungna remchang vawi hnih ngawt a nei a, mahse, Al Haji hian ṭha zetin a dansak ve ve.
Iran tana Hajsafi-a goal khung chu Syrian striker Omar Al Somah handball zara penalty aṭanga lut a ni a, Syria hian goal khungna remchang an nei ve bawk. Mahse, Mahmoud Al Mawas chuan mawi zeta Iran defender pahnih bumin ball lalut mah se a shot chuan crossbar a per hnuah pawn lamah a sawt chhuak a, a vanneih zan a ni lo.