Africa - World Cup playoff khel tur a chiang ta

World Cup khel tura Africa khawmualpuiin hmun ruak an neih zat chu panga a ni a, he hmun ruak panga luah tur hi playoff hmangin chinfel a ni dawn.

Cameroon, Tunisia, Algeria leh Nigeria-ten Thawhlehni zan khan playoff-a hmun ruak pali chu an tichiang ve leh ta a, anni hma hian Democratic Republic of Congo, Egypt, Ghana, Mali, Morocco leh Senegal chu playoff khel tur hian an lo tling tawh.

Thawhlehni zan inkhel pawimawhah Cameroon leh Ivory Coast an inhmachhawn a, Cameroon-in 1-0 a hnehna an chan avangin Ivory Coast hi World Cup 2022-ah kan hmu dawn lo.

A kalphung
Africa khawmualpuia football thuneitu sang ber Confederation of African Football (CAF) chuan qualifier hi first round aṭangin a kalpui a, first round-ah hian team 28 (rank 27-54) te chu home & away a inkhelin a chak zawk chu second round-ah an tlang.

Second round-ah hian rank 1-26 nen first round aṭanga tling team 14-te chu an awm khawm a, group 10-ah team pali ṭheuh zel awma ṭhen hran niin, group tina hmahruaitu hi playoff (third round) khel turin an tling.

Playoff-ah hian team 10 hi home & away hmanga inhmachhawn tur draw neih a ni dawn a, inkhela chak zawk ṭheuh chu World Cup khel turin an tling dawn a ni - tlin lohna chance a la sang hle.

Bye bye Ivory
Thawhlehni zana Cameroon leh Ivory Coast inhmachhawn hmain group D-ah Ivory hian point 13 hmuin hma an hruai a, an hnuai chiahah point 12 neitu Cameroon an awm thung.

Match tawp berah team pahnih an intawng zui a, a chak zawk zawk chu tlang tur an ni. Lyon forward Karl Toko Ekambi chuan Cameroon tan minute 21-naah inkhela goal awmchhun a khung a, playoff-ah a team a hruai thleng.

Cameroon tan Ajax keeper André Onana a langsar a, Ajax tana a khelhpui, Ivorian striker Sebastien Haller chuan Onana goal venah pet goal-na chance nei mah se bar a tih per a, tlang tura draw chiah mamawh Ivory Coast an tlawm avangin nakkum World Cup-ah kan hmu dawn lo.

Tunisia chak awlsam
Thawhlehni zanah Tunisia-in Zambia lakah chak ngei ngei an mamawh a, Wahbi Khazri chuan penalty chhuih lut lo mah se Aissa Laidouni, Mohamed Drager leh Ali Maaloul ten goal khat ṭheuh an khung avangin 3-1 in an chak.

Zambia goal awmchhun hi Fashion Sakala khung a ni a, Rangers striker hian Inrinni khan Mauritania lakah hattrick a lo siam tawh bawk - playoff khel tur erawhin a team a hruai kai zo ta chuang lo.

Group B inkhel dangah Equatorial Guinea chuan chak mamawh mah se 1-1 in Mauritania an inhnehtawkpui a, a vawi khat nana World Cup khelh an beiseina chu point hniha Tunisia phak loin a thamral.

A tawpah Algeria
Algeria tan an match tawp berah playoff inpetkai turin draw a tawk a, an khingpui Burkina Faso tan chak a ngai thung. A tawpah Algeria an dingchang a, 2-2 a inhnehtawkin playoff an inpetkai.

Manchester City forward Riyad Mahrez chuan Algeria tan minute 21-na lekah goal hmahruai khung mah se Zakaria Sanogo chuan Algerian keeper Rais M'Bolhi chu ball chip khumin si phurh a sut.

Mahse, Algeria tan bench aṭanga luhtir Sofiane Feghouli chuan a khung ve leh a, hahdam takin an tlang dawn emaw tih laiin Issoufou Dayo chuan penalty hmangin si phurh a sut ve leh a, Algeria an ṭang tluan hram - match 33 chhung chu a zawnin an tlawm tawh lo a, international football-a tlawm loa kal rei ber Italy (37) an hnaih ta hle.

Nigeria an tlang
Playoff khel phak turin Nigeria pawhin an match tawp berah draw result an mamawh a, Cape Verde nen 1-1 in an inhnehtawk. Nigeria tana minute khatna lekah Napoli striker Victor Osimhen chuan goal hmahruai a khung.

Cape Verde tan Stopira chuan minute li hnu lawkah si phurh sut mah se goal dang a lut lo a, Nigeria an tlang. Morocco tan erawh harsa a awm lo a, match ruk an khelha an chak vawi rukna ni turin Guinea chu 3-0 in an sawp a, an tlang chiang hle.

Mohamed Salah telna Egypt chuan 2-1 in Gabon an hneh a, anni erawh an match tawpna ber an khelh hma hian playoff khel turin an tling chiang tawh.