Second round-ah Srikanth a lut

Kidambi Srikanth chuan Christo Popov hnehin Indonesia Masters Super 750 badminton tournament khelh laiin second round a lut. Mixed doubles lamah Dhruv Kapila leh N. Sikki Reddy te pawhin hnehna an chang ve bawk.

Nimin inkhelah world number 1 hlui Srikanth-a'n world no 71 Christo lakah hian 21-18, 15-21, 21-16 in hnehna a chang a, chak tur hian darkar khat leh minute 15 hun a mamawh.

Srikanth hi a vanglai chuan khawvel player ṭha berte zinga mi a ni. Mahse, tun hnaiah a tlahniam ve ta viau, tunah hian world number 15 a ni phak hram a, season a hman ṭhat loh avangin tun ṭumah pawh hian beisei san a harsa.

Mixed doubles pair Dhruv Kapila leh Sikki Reddy te hian Indonesian duo Praveen Jordan leh Melati Daeva Oktavianti te chu 21-11, 22-20 in an hneh ve bawk.

Indian player zingah Commonwealth Games champion hlui Parupalli Kashyap erawh a chak lo. Kashyap hi Denmark tlangval Hans-Kristian Solberg Vittinghus lakah 10-21, 19-21 in a tlawm.