Mexico hmaah champion lai mualpho

FIFA World Cup champion lai chu Germany an ni a, champion nawn tura rinkai zinga mi an ni. Pathianni zan khan Moscow-a entu 78,011 hmaah Die Mannschaft hian Mexico an hmachhawn a, World Cup vawi li champion tawh tlarhnung hi vawi tam sut hawn a ni a, an goal chhuah zat erawh goal khat chauh a ni.

El Tri tan Hirving Lozano chuan minute 35-naah goal awmchhun a khung a, 1-0 in an chak. Kum 22 mi PSV Eindhoven winger hi Mexican zinga hmabak nei êng ber zinga mi a ni a, season hman zawh taka Dutch club leh qualiyfing-a a khelhna team tana goal khung tam ber niin Germany lama a goal khung avang hian a hlutna a san belh sawt ang.

Tlarhnung pawp
Season pum deuh tho inlan tawh lo Manuel Neuer-a'n Germany captain armband a rawn hreng a, inhliam vanga Bayern Munich season hmang tluan thei lo Jerome Boateng leh Mats Hummels te chu defence laiah an inkawp a, left back Jonas Hector chu damlohna avanga a inlan theih loh avangin Cologne defender aiah hian ram tan vawi ruk lek la inlan Marvin Plattenhardt a inlan.

Bayern wing back Joshua Kimmich erawh a dam ṭha a, goal venhim aia goal nawr tura hun a hman tam avangin Germany tlarhnung a pawp a. Defence lai leh midfield-a awm Sami Khedira leh Toni Kroos te an inthlawp fuh tawk lo a, Mesut Ozil leh tlarhmaa awm dangin ball an hloh ngun avangin Mexico-in vuak letna remchang an hmu thei zel.

Keeper Neuer-a'n hna a ngah a, Germany chhantu a ni. Bayern keeper hian Hector Herrera leh Hector Moreno te goal khung tur vawi khat ve ve a dang a, Miguel Layun-a goal khung tur vawi thum a dang. Chance nei ṭha ber Chicharito erawhin goal-ah a pet thei lo!

German club Bayer Leverkusen tana hming chher tawh Javier Hernández-a'n Joachim Low a tlarhnung tan buaina siam mah se a tawp a khar thei lo. Manchester United striker hlui Chicharito hian assist erawh a nei tho a, minute 35-naah a ball pek chu Lozano-a'n Ozil-a bum nan hmangin a ball pet kawh tak chu Neuer-a tan dan theih a ni lo.

Germany midfielder Toni Kroos-a'n crossbar pet per chhunzawm mah se goal hmaah Mexico chu team hlauhawm zawk an ni a, champion lai tlarhnung chu inpuahchahna nei lo ang mai an ni a, ball tlang phei tawh chu goal hlauhawma chhuak vek ang hialah a ngaih theih.

Insiamṭhatna tluan tling lo
Germany coach Joachim Low-a'n halftime hmang ṭangkaiin tlarhma lam a siam ṭha tih a lang a, Mexico lamin goal venhim an ngaih pawimawh bawk avangin ball an chang tam a, amaherawhchu an tlarhnung erawh a la pawp reng.

Hun chanve hnu lamah pawh Mexico chu goal chance nei ṭha zawk an ni a, inkhel thununtu Germany-in chance ṭha bik an insiam thei lo. Marco Reus luh hnuah champion lai goal nawr a na a, substitute Mario Gomez-a'n goal khung theihna tur hun ṭha a hlah a, coach Low-a'n attacking player pahnih dahlut tur hian tlarhnung lam player pahnih Plattenhardt leh Khedira te la chhuakin risk a la.

Minute 86-naah beisei pha lo Timo Werner aiah Julian Brandt lutin Manchester City winger Leroy Sane aia thlan hian goal ban a pet per a, Germany-in goal an khung theih miau loh avangin chak phu zawk Mexico-in hnehna an chang.

Mexico-ah Lirnghing
• Mexican sorkar chuan lirnghing tehna seismometers-ah chuan siam chawp lirnghing a awm thu an nemnghet a, hei hi Lozano goal khung laia thil thleng a ni.
• Vawi 5 inlan: Kum 39 mi Rafael Marquez chu minute 74-naah a tlan lut a, Mexican player hi World Cup-a vawi nga (2002, 2006, 2010, 2014 & 2018) inlanna a ni a, hetiang tithei hi pathumna chiah niin Antonio Carbajal, Mexico (1950, 1954, 1958, 1962 & 1966) leh Lothar Matthaus, Germany (1982, 1986, 1990, 1994 & 1998) te nen huang khatah an awm.
• Germany-in WC 2002 final-a Brazil an hneh loh hnua (kum 28, ni 166) starting eleven upat ber ṭum a ni a, Mexico hneh lotute kum chawhrual hi kum 27 leh ni 310 a ni.
• Germany chanchinbu chuan a hnuaia tarlan ang hian inkhel chanchin an ziak
“ Vanglai hun a pel ta. Hun rei tak chhung chu Germany hi an inrem dik tawh lo a, beisei an pha tawh lo
– Sueddeutsche Zeitung
“ Thil theih loh a thleng a. World champion Germany mualphonaa sengluttu chu anmahni a ni
– Die Welt
“ Hetianga kan khelh zel chuan kar thum bak world champion tiin kan inchhal thei tawh lo ang
– Bild
“ Hmabak êng tak kan nei tih pholang a, kan hnathawhah ka lungawi hle. Huaisenna nen inelna kan hmachhawn a, kan thinlung zawng zawngin goal kan venghim
– Juan Carlos Osorio, Mexico
“ Kan chak loh avang hian kan vaiin kan lunghnur a, hetiang dinhmun hi kan lo tawng tawh a, kan tho chhuak leh ang.
– Joachim Low, Germany