Salah hun a thleng dawn ta

Egypt-in an match hmasa berah khel ṭha tak chungin Uruguay chu 0-1 in an ngam lo a, Pharoah ṭantute titi tam ber chu, "Mohamed Salah chu awm se aw..." tih hi a ni.

Pharoah mipuiten an hriat duh an hre ta - Mohamed Salah a dam tawh a, zanin dar 11:30-ah Egypt hian inelna thlengtu Russia an hmachhawn dawn a, Egyptian Football Association chuan Salah dam tawh thu an sawi.

Egypt hi an match hmasa berah an tlawm tawh avangin last 16 luh beisei tur chuan tlawm nawn a thiang lo a, Russia-in 5-0 ngawta Saudi Arabia an hneh tawh avangin knockout round lut turin point thum dang hmuh belh a tawk thei ang.

Beiseina & Salah
World Cup ṭan hmain Russia pan player zingah Lionel Messi, Cristiano Ronaldo, Neymar leh Mohamed Salah te chu hming lam ngun an ni a, Ronaldo tih chauh loh chu an match hmasa bera beisei phak an la awm lo.

Iceland lakah Messi-a'n penalty a pet goal lo a, Ronaldo-a'n Spain lakah hattrick a siam laiin Neymar chu Switzerland lakah dah boin a awm bawk - hliam vangin Salah erawh Uruguay a hmachhawn thei lo a, zaninah a theihna pholan hun a thleng ve dawn ta.

Egypt-in Uruguay lakah an khel ṭha a, an buaina erawh tlarhma lamah a hmawr bawktu an nei lo kha a ni. Coach Hector Cuper chuan, "Mo Salah chu awm se kan result a danglam ngei ang," tiin a sawi bawk.

Zaninah chuan Egypt coach-in Salah a nei tawh dawn a, chhuanlam dang zawn a thiang tawh lo. Tlarhnungah West Brom defender pahnih Ahmed Hegazi leh Ali Gabr an pawimawh leh ang a, Arsenal midfielder Mohamed Elneny chet ṭhat a ṭul bawk ang. Hetihlai hian Uruguay laka inhliam midfielder Tarek Hamed chu inkhel turin a dam tawh.

Team ṭha Russia
World Cup match hmasa ber khelh a nih hmain Russia lakah mipuiin beiseina neih an harsat a, mahse major tournament-a Russia chhiat ber ṭum ang hiala an sawi team hian 'a thlengtu zia' an chhuah nghal a, 5-0 ngawtin Saudi Arabia an sawp.

Mahse, Saudi aiin Egypt an khauh zawk dawn tih a chiang a, Salah nen phei chuan team dang daih an ni. Russia midfielder Anton Miranchuk chuan, "Saudi aiin Egypt hi an ṭha zawk tih kan pawm thlap a, Salah a awm phei chuan an danglam lehzual ang. Mahse, player 11 thoin an khel dawn a, Salah tih theih chu enchhin ila," a ti a, Salah telna Pharoah a hlau lo.

Saudi laka goal hnih khungtu Denis Cheryshev chuan, "Saudi chu thil thleng tawh a ni a, theihnghilh a hun tawh. Mo Salah a khelh avangin kan buai sawt dawn lo a, a nuam sawt ang. Mo hi khawvela player ṭha ber zinga mi a ni a, chutiang player hmachhawna hnehna chan bawk chu a nuam duh bik a ni," a ti!

Russia tan Saudi laka inhliam midfielder Alan Dzagoev chu group stage chhung a inlan theih a rinawm tawh lo a, Chelsea midfielder hlui Yuri Zhirkov hliam chu a serious lo nia ngaih a ni bawk. Villarreal winger Cheryshev, freekick pet goal tu leh set piece pet thiam Aleksandr Golovin te chu ven hautak tur an ni dawn a, goalkeeper Igor Akinfeev paltlang hi thil zuamawma ngaih chi a ni lo.