Sweden-in South Korea an hneh

Nimin tlai FIFA World Cup inkhelah Sweden-in Andreas Granqvist goal hmangin South Korea 1-0 in an hneh. Group F-ah Sweden leh Mexico-in point thum hmuin hma an hruai a, Germany leh South Korea te tan hmabak a harsa sawn dawn.

Goal khat a tawk
Sweden-in first half-ah chance an ngah zawk a, South Korea keeper Cho Hyun-woo a che ṭha hle. Minute 20-naah Marcus Berg chuan six yard box pawn chiahah ball ṭha chang fuh mah se keeper Cho-a'n a dan sak.

Kum 31 mi Berg hi Russia rama Sweden player zin zinga goal khung tam ber a ni a, Korea keeper Cho erawh keeper pathum zinga la ram tana la inlan tlem ber a ni a, 3rd choice keeper anga sawi ni mah se first half-ah a khel ṭha ber.

Second half-ah pawh Cho khel ṭha chhunzawm mah se ṭul lo taka Kim Min-Woo-a'n Swede midfielder Viktor Claesson a tlawh thluk an tuar. VAR hmanga thil thlen dan ennawn a nih hnuah penalty pek a ni a, minute 65-naah Sweden captain Andreas Granqvist chuan 'cool' takin goal kilah a khung a, chakna goal a ni zui bawk.

Hmabak chu
June 23, Inrinni zan hian Group F team te hi an inlan leh dawn a, zan dar 8:30-ah Mexico leh South Korea an inkhel ang a, darkar thum hnuah Germany leh Sweden te an inkhel ang.

Point thum hmu tawh Sweden hian Germany an hneh a, Mexico-in point an hlawhchhuah bawk chuan match hnihna lekah champion lai Joachim Low hote an tla thei dawn tihna a ni a, hei vang hian Inrinni zan inkhel hian ngaihven a hlawh lehzual ang.