Vawiinah Johnkenty inhnek dawn

Ulaanbaatar Cup International Boxing Tournament-a tel turin Mizo boxer Johnkenty Vanhlimpuia chu India aiawhin a feh chhuak a, vawiin aṭangin an inlan ṭan ang. Inelna hi Ulaanbaatar, Mongolia-ah June 25 thleng khelh tur a ni.

Pro Fight aṭangin Johnkenty hian Mizo hriat a hlawh a, tualchhung inelna ngaihhlutah hian kum 2014 leh 2015 khan middle weight-ah a champion, kum 2016 leh 2017-ah heavy weight-ah a champion leh bawk. Kum 2011 khan sub junior championship-ah bronze medal a la a, North East Games-ah Mizoram tan gold medal (2015) leh bronze medal (2014) a dawng tawh bawk.

Elite man senior national championship-ah Mizoram tan kum zawnin silver medal a dawng. Silver a dawn hmasak hian India Navy-ah lakluh a ni a, a inlan hnuhnun zawk hi nikum kha niin Visakhapatnam-ah a chet ṭhat avangin India camp zawm turin Laldinmawia leh NT Lalbiakkima te nen thlan an ni.

Tuipui tlangval John Kenty hi India Navy-a a luh hnu lawkah a hnar a thi ṭhin avangin a buai a, tunah erawh a inenkawl dam tawh. January thla khan India Open International-ah ram tan inlanin quarterfinal-ah Cuba boxer a hneh lo a, tun ṭum hi ram pawna a zinchhuah hmasak tur a ni ang.