Neymar leh Brazil an chelh

World Cup ṭan hmaa team sawi hlawh tak ni mah se Brazil-in an match hmasa berah hnehna an chang zo lo a, Switzerland nen 1-1 in an inhnehtawk!

Tite enkawlna hnuaia sawi vul hlawh tak Brazil-in beisei an phak lo a, chak zawh loh chhuanlam tur an nei lo–minute 20-naah Philippe Coutinho chuan mawi zetin hmahruaina goal a khung a, Swiss team-in Steven Zuber hmangin an rul.

Brazil-in hun tawp thlengin goal dang an khung tawh lo a, champion tura beisei team hi an match hmasa berah point khata an lungawi a ṭul. Kum 1978 hnua World Cup match hmasa bera Brazil chak zawh loh leh hmasak ber a ni.

Group E inkhel hmasa zawkah Serbia chuan 1-0 in Costa Rica an hneh ve bawk a, Serbia tan captain Aleksandar Kolarov chuan ṭha zetin freekick a pet lut.

Goal mawi bik
Brazil-in tlarhmaah Neymar, Gabriel Jesus leh Willian hmangin bul an ṭan thei a, anmahni thlawp tura Philippe Coutinho leh Paulinho te ho an la awm cheu bawk avangin an lakah beiseina a sang.

Minute 20 a liam a, beisei ang ngeiin Brazil-in goal hmahruai an khung–Coutinho chuan a 'special' na pholangin goal chunglam kil sir zetah a pet kual lut a, goal mawi bik, player satliah tana khung theih loh a ni.

Beisei angin Brazil erawhin an nawr zui lo a, a tawi zawnga sawi chuan an match hnuhnung 21-a vawi khat chiah tlawm team kha an ang lo–hliam vanga a lo kir hnuah Neymar-a'n match hnih khelin goal hnih khung mah se Switzerland lakah erawh player satliah ve mai a ni thung.

Pound maktaduai 200 man forward hian a hun ṭha neihchhun ang deuhthawa chhiar theih chu Swiss goalkeeper Yann Sommer zawnah tak a tauh a, mipui beisei 'Neymar' hmuhtir kan ni lo–tun ṭuma kan hmuh chu Neymar 've tawp' a ni!

Minute 79-naa Roberto Firmino luhtir a nih hnuin Brazil goal nawrin awmzia nei deuh sawt mah se Liverpool forward hian goal erawh a keng tel bik lo–kum 26 mi striker tauh goal ngei tur nia lang chu Sommer chuan ṭha zetin a dang a, defender Miranda chuan uiawm zetin a pet out bawk.

Fak tlak Swiss team
FIFA hmunpui innghahna Switzerland leh Brazil squad enin Swiss team lakah beiseina neih san ngam a har a, mahse game plan fing tak hmanga huaisen taka an khelh miau avangin Brazil an chelh.

Minute 50-naa Steven Zuber goal khung danah Brazil tlarhnung dem theih an ni a, Switzerland tana a vawi 14-nana inlan ve chauh venghim turin an tih tur an ti lo–corner aṭanga ball kal chu awlsam zetin a tauh lut.

Swiss team chakna kawngah Udinese midfielder Valon Behrami chu fak phu a ni a, kum 33 mi midfielder hi Brazil game 'play' tur dangchat tu ber niin Neymar dah 'nil' tu a ni a, a pass 93% zet chu a ti dik bawk.

Switzerland-in an hnathawh tur an hrechiang a, Brazil goal-ah na taka nawr chu chetsual theihna a ni tih an hria–an pawng tawng nawr duh lo. Swiss team tan tlarhmaa mal tlat Haris Seferovic chuan minute 80 chhungin penalty area-ah ball a khawih fuh miah lo!

Neymar = Nil?
Paris Saint-Germain-ah a inhliam vangin Neymar a inkhel lo reng a, Brazil mipuiin beiseina sang tak nen an thlir laiin Russia pan dawn hnaihah a dam a, friendly match vawi hnih a khelhah goal a khung ve ve.

Hei vang hian Barcelona forward hlui hi World Cup khel turin a inpeih tawhah ngaih a ni. Mahse, Switzerland team-in Neymar dan theih dan an hria a, chu thil chu Brazilian forward ball chan tam tir loh a, a ṭul chuan foul a ni!

Switzerland player-te kha Neymar lakah vawi 10 ngawt an foul a, World Cup 1998 hnua player mal laka team an foul ngun ber a ni hial.

Brazil coach Tite chuan, "Kha ai khan kan rilru pe deuh ila chu Switzerland goalkeeper tan khan hna tam zawk kan siam ngei ang. Chak chunga bul ṭan tum kan nih avangin kan result-ah hian lawmna tur a awm lo," tiin a sawi.

Serbia beiseina
Costa Rica leh Serbia-in group khatah Brazil an awmpui tih an inhria a, an match hmasa berah chak duhna thinlung nen an bei nghal–a tawpa vannei zawk erawh Serbia an ni a, 1-0 in an chak.

First half-ah team pahnihin goal an khung loh ve ve hnuin Serbia hian minute 56-naah freekick an hlawh chhuak a, Roma defender Kolarov chuan yard 25 vela hla aṭangin mawi zetin a pet lut. Costa Rica goalkeeper Keylor Navas tan tih theih a awm lo.

Serbia hi an vanneih ṭum chu ni se goal khat aia tam zawk khung thei an ni a, mahse Newcastle United striker Aleksandar Mitrovic-a'n ṭum dang a phak tlat lo. Hetihlai hian midfield thununtu Sergej Milinkovic-Savic chu fak phu a ni a, Lazio midfielder hi World Cup zawhah team lian zawkin an thli thlai a nih pawhin a mak lo ang.

Costa Rica tan erawh hmabakah Switzerland leh Brazil an awm avangin kalkawng a harsa lehzual sawt dawn a, kum 2014 World Cup-a Uruguay, Italy leh England awmna group-a hmahruaitu nichunga last 16 lut thei team hi beisei bo erawh an la ni lo.