Nomawi 98 chawi thei Roger Federer

Roger Federer chuan Milos Raonic hnehin Mercedes Cup a chawi a, Grand Slam vawi 20 champion tawh hian ATP tour level title 98 ngawt a vaw chhuak tling ta.

Pathianni zan Stuttgart-a inkhelah Federer hian Canadian tlangval hi 6-4, 7-6 (7-3) in a hneh a, final a luh theih avang khan tun kara ranking chhuak thar berah chuan Rafael Nadal khumin a chung berah a awm leh tawh dawn a ni.

Kum 36 mi Federer hi March thla khan Miami Open-ah a chak lo, Australian Open champion hian clay court season a hmang zui lo. Season hmasa ang bawk khan French Open pawh a khel lo a ni. Federer tan grass court season a hman ṭanna a champion nghal hi Wimbledon atana inbuatsaihna ṭha tak a ni thei ang.

Swiss star Federer hi season hmasa khan Mercedes Cup-ah hlawhtling lo mah se Gerry Weber Open-ah nomawi chawiin, a vawi riat nan Wimbledon a chawi zui bawk. Tun season-ah a vawi 10 nan Halle-ah champion a tum leh dawn a, kum hmasa lam angin grass court inelna lian hmachhawn turin a inpuahchah nasa hle.

Federer chuan, "Tournament chhung zawngin ka khel ṭha hle a, ka tan chuan rawn kir lehna ṭha ber a ni. Tunah chuan Halle leh Wimbledon atan rilru ka seng zui tawh dawn a, hlawhtlinna belhchhah tura number 1 ka ni zui leh thei hi a hlimawm takzet bawk," tiin a sawi.