Hriatthiam har Group H inlan hun Colombia Vs Japan; Poland Vs Senegal

Vawiin hi FIFA World Cup-a inlan tur ram 32 te inlan kim hun chiah a ni a. Tlai dar 5:30 hian Colombia leh Japan te Mordovia Arena-ah an inkhel dawn a, zan dar 8:30-ah Poland leh Senegal te Spartak Stadium-ah an inkhel bawk dawn. Group H ram pali zingah chungnung fal tur an awmin a lang lo a, hnufual bik tur an awm hmel loh avangin knockout stage tling tur hriatthiam a harsa hle.

Colombia Vs Japan Sulhnu leh Tlin dan

Colombia hi World Cup qualifying harsatna South America aṭanga tling an ni a, palina hauh pha chauh mah se an chunga awm Argentina chu point khat chauhin an pha lo. Los Cafeteros hian WC hnuhnung berah quarterfinal an thleng a, player langsar an ngah bawk avangin group H-ah chuan huhang ngah bera chhal theih an ni ang.

Japan hi qualifying-ah tun World Cup-a inlan dang Saudi Arabia leh Australia te nen an awm ho a, group hmahruaitu ni thei an ni. Kum 1998 aṭang khan an la inlan ziah a, kum 2002-a WC an thlen ṭum leh South Africa-a neih a nih ṭum kum 2010 te khan round of 16 an thleng a, hei aia thui an la pel lo.

Friendly match

Colombia hian March thla khan friendly match-ah France an hneh thei a, amaherawhchu an khingpui hnuhnung pahnih Australia leh Egypt te goal awm lo ve vein an inhnehtawk pui.

Japan hian thla hmasa khan friendly match-ah Ghana 0-2 in an hneh lo a, tun thla tir khan hetiang zat bawk hian Switzerland an hneh lo a, kar liam ta khan Paraguay 4-2 in an hneh thung.

Team enkawltu

Kum 2012 aṭangin Jose Pekerman-a'n Colombia hi a enkawl ṭan a, Argentina-a piang Colombia khua leh tui nihna nei manager hian an ram team a enkawl hnuah South American Coach of the Year atan vawi thum thlan a ni tawh.

Kum 68 mi Pokerman hian tun hmain Argentina youth team leh senior team a enkawl tawh a, FIFA Confederations Cup 2005-ah Argentina hi pahnihna a nihpui.

Japan-in World Cup April 9 khan an coach Vahid Halilhodzic an ban a, a hmunruakah hian khawdang hawi loin Japan Football Association (JFA) technical director nilai Akira Nishino an dah nghal.

Kum 63 mi manager hian player a nih laiin Japan tan match 12 a khel hman a, coach a nih hnuah Japan Under 20 leh U23 a enkawl a, 2016 aṭang khan technical director a nih bawk avangin Japan football team hrechiang ber tura ngaih a ni.

Nishino hian Japanese club langsar Gamba Osaka a enkawl laiin nomawi chawi theih league nomawi, J League Cup, Japanese Super Cup leh AFC Champions League nomawi te a chawi vek a, J. League Manager of the Year-ah ṭum hnih thlan tawh niin AFC Coach of the Year-ah vawi khat thlan a ni tawh bawk.

Inkhel tur chu

World Cup hnuhnung berah Colombia-in Japan hi 4-1 in an sawp a, group hmahruaitu an nih laiin Asia aiawh erawh table mawngphahah an awm. Colombia midfielder James Rodriguez chuang hming chherin goal ruk khungin golden boot a dawng a, tun ṭumah hian Bayern Munich midfielder hi player pawimawh a ni chhunzawm leh ang.

Inelna hnuhnung bera inhliam vanga inlan lo Radamel Falcao a inlan thei tawh dawn a, Monaco striker tan World Cup hmasa ber ni mah se Colombia tana goal khung tam ber record hauhtu a nih avangin a buk a rit nghal hle. Falcao leh Rodriguez bakah hian Arsenal keeper David Ospina, Tottenham defender Davinson Sanchez, Juventus midfielder Juan Cuadrado leh Sevilla forward Luis Muriel te chu hming langsar tur an ni.

Japan hian Colombia hi vawi thum an hmachhawn tawh a, World Cup hma hian 2003 Confederations Cup-ah 1-0 in an hneh lo a, kum 2007 khan friendly match-ah goal awm loin an inhnehtawk a, chak an la nei lo tihna a ni. Akira Nishino hote hi group H-ah team nem tura ngaih an ni a, Colombia lakah result ṭha an nei dawn a nih chuan ram pawna khel Keisuke Honda (CF Pachuca), Shinji Okazaki (Leicester City), Shinji Kagawa (Borussia Dortmund), Maya Yoshida (Southampton) leh Yuya Osako (Cologne) te an che ṭhat a ṭul dawn a ni.