Lorenzo a chak nawn

Bike intlansiakna sang leh ngaihhlut ber MotoGP rider championship inum a hmuhnawm chho zel. Pathianni zana tlan zawh tak Catalan GP-ah Jorge Lorenzo chuan hnehna a chang a, Ducati rider hian a zawna hnehna a chan tak avangin table-ah pasarihna dinhmun a luah leh ta.

Circuit de Barcelona Cata­lunya-ah Lorenzo hian pole position aṭangin bul a ṭan a, harsatna lian tham a tawk lo. Champion lai leh hmahruaitu ni bawk Marc Marquez aiin 4.479sec in a thleng hma zawk a, pathumna Rossi aiin 7sec in a thleng hma zawk bawk.

Kum 31 mi Lorenzo hian intlansiak hnuhnung zawk Mugello-ah hnehna a chang tawh bawk, intlansiak vawi 19 awm tur zinga vawi sarih an tlan hnuah Lorenzo hian point 66 hmuin pasarihna a ni. Hmahruaitu Marquez chuan point 115 a hmu a, Honda rider hnungah hian Rossi (88 points) leh Maverick Vinales (77) te an awm bawk.

World champion vawi thum ni tawh Lorenzo hian season hmasa khan beisei a phak lo a, kuminah pawh result ṭha a nei hleithei lo. Ducati bike khalh chunga a vawi khat nan Montmelo-ah hlawhtlinna a chan hnuah a tlan ṭhat a chhunzawm a, tun ang zela a tlan thei a nih chuan a chunga rider awm mekte tan ngaimawh tham a tling chho leh thuai ang.

Season thara Honda bike khalh tur Lorenzo hian, "A zawna vawi hnih chak theih hi chu a lawmawmin a hlu takzet," a ti. Lorenzo-a teammate An­drea Dovizioso erawh tlan ṭha viau mah se a hmawr bawk hma­in a chesual a, season hma­sa lama hnehna a chan tawhna hmunah a beisei ang result a hmu ta lo. Season hma­sa pahnihna hian tun hnai intlansiak hnuhnung pali zinga pathumah podium a lawn phak ta lo.

Hnehna chang zo lo mah se world champion vawi li ni tawh Marquez pawh a thlen chinah a lawm tho. Spanish rider chuan, "He hmunah hi chuan Ducati hi hneh an har em em a ni. Season dangah pawh an chet ṭhat tawh ṭhinna hmun a ni a, tuna pawimawh chu championship lama kan hmahruaina kan belhchhah thei hi a ni," tiin a sawi.