Murray-a'n Wimbledon a beisei lo

Kum khat chhung deuh thaw hliam vanga a inkhelh theih loh hnuah Andy Murray a rawn kir leh tawh a, world number 1 hlui hian Grand Slam nomawi a la chawi leh ngei a beisei thu sawi mah se July thlaa khelh tur Wimbledon-ah erawh a hlawhtlin zui nghal a inring lo.

Britain tlangval Murray hi a khel bawr na vangin a buai rei ta hle a, January thla khan zai niin tunkar chhunga khelh tur Queen's Club-ah a inlan ve leh chiah ang - a match hmasa ber atan zanin hian Nick Kyrgios nen an intawng dawn.

World number 157 ni mek Murray chuan, "Hun rei tak inkhelh loh hnua Grand Slam nomawi chawi leh nghal chu thil theih loh ni lo mah se, tun dinhmunah chuan beiseina a sang lo. A nihna takah chuan tunah hian beiseina ka nei sang lo a, chutihrualin hma ka sawn leh zel a nih chuan engtik niah emaw chuan ka la hlawhtling ve leh ang," tiin a sawi.

Kum 31 mi Murray hian 2016 khan a vawi hnih nan Wimbledon title a la a, grass court inelna liana a hlawhtlin hnu hian nomawi liantham chawi a la nei leh lo a ni. Tennis court chhunga a luh loh hlan hian Roger Federer leh Rafael Nadal ten nomawi lian dawn theih chu an insem zo vek a, player ropui pahnih hi an khelh ṭhat tluan lai a nih leh tawh avangin player dang tan kawng a inhawng zau leh tawh rih lo hle.