ISL ṭan a ni dawn ta - Mizoram player tamna Odisha

India rama club football inelna sang ber Indian Super League chu zanin dar 7:30-ah khelh ṭan a ni dawn a, ATK Mohun Bagan chuan Kerala Blasters an mikhual dawn.

Covid-19 vangin ISL hi season hmasa ang thoin Goa chuan a thleng dawn a, zanin inkhel tur pawh hi Fatorda Stadium-a inhmachhawn tur an ni.

ATK Mohun Bagan-in Mizo player tel lo pawha ṭha tawkah an inngai a, anni hi tun ISL-a Mizo player awm lohna club awmchhun an ni dawn.

Mizo player kawl ve reng ṭhin Kerala Blasters-in Mizo player pakhat chiah an kawl tawh a, K. Lalṭhathanga (Puitea) chuan South Indian club jersey ha chungin Bagan hi a rawn hmachhawn ang.

Odisha-ah 8
ISL club zingah Odisha FC chu Mizoram player kawl hnem ber an ni a, Mizoram chhuak player pakua an kawl. Odisha hian Mizoram mi ni lo, Zo hnahthlahtlak tlangval Sebastian Thangmuansang an kawl tel bawk - ani hi Churachandpur lam chhuak a ni.

Odisha hian tun season-a Mizoram player thar lakluh pahnih an nei a, Kerala Blasters aṭangin defender Lalruatthara leh Jamshedpur aṭangin attacking midfielder Isaac Vanmalsawma te chu free transfer-in an lalut.

Anni bakah hian midfielder Paul Ramfangzauva, defender Lalhrezuala Sailung, forward Isak Vanlalruatfela, striker Daniel Lalhlimpuia, forward Jerry Mawihmingthanga leh forward CVL Remtluanga te chu Mizoram player an kawl sa an ni bawk.

Hetihrual hian Mizoram player-te tan Odisha-ah hmun pawimawh chan vek a harsa ang tih a chiang a, Aizawl FC midfielder hlui Paul, striker tawnhriat nei ṭha Daniel, Hmunhmelṭha tlangval Ruatthara leh Shillong Lajong captain hlui Isaac te erawh hmun pawimawh chang phak tura beisei an ni.

Inbuatsaihna a ṭha
Ṭum dang zawng aiin ISL club-ten pre-season an nei hma a, player lam pawhin inbuatsaihna ṭha an neih chu an chhawr an inbeisei thu an sawi.

Odisha striker Daniel Lalhlimpuia chuan, "Nikum aiin inpuahchahna pawh kan nei rei zawk a, tun dinhmunah chuan kan kal dan a fuh rih viauin ka hria," tiin Vanglaini a hrilh a, season ṭha tak hman a inbeisei.

Tun season ISL-ah club tel thar tur an awm lo a, ATK Mohun Bagan, Bengaluru, Chennaiyin FC, East Bengal, FC Goa, Hyderabad FC, Jamshedpur FC, Kerala Blasters, Mumbai City, NorthEast United leh Odisha ten season hmasa ang thoin inelna an hmachhawn dawn.

Season dang ang thoin club 11 an inkhel kual ang a, an inkhelh kual hnua a sang paliin semifinal an khel ang a, final hmangin ISL nomawi chawi tur zawn a ni ang.

Hriat tur pawimawh
Covid-19 vangin inelna hi home & away-a khelh theih a ni dawn lo a, Goa chuan Fatorda Stadium, GMC Athletic Stadium leh Tilak Maidan Stadium-ah te inelna hi a thleng dawn a ni.
ISL club-ten ram pawn player pasarih an lakluh theih ṭhin chu tih danglam a ni a, ram pawn player paruk bak lakluh a rem tawh lo a, ram pawn player pali aia tlem neih a thiang lo bawk - ram pawn player zinga pakhat tal chu Asian player an nih a ngai.
Club-in khelmualah ram pawn player pali bak an chhawr a rem lo a, khelmualah Indian player pasarih tal an awm reng a ngai tihna a ni.
League rem tihsaknain marquee player lakluh theih an ni.
Club chuan development player pahnih tal an nei tur a ni, tih ṭhin chu paliah tihsan a ni a, match-day squad-ah development player pahnih tal an awm zel a ngai bawk.
Club chuan squad-ah player 35 aia tam a neih a thiang lo a, chung zinga pathum chu goalkeeper an ni tur a ni. Indian player bikah inhliam an awm chuan club-in player dang lalutin a thlak thei ang.
Player-te chu vaccine dose hnih la vek tawh tura beisei an ni.

Zanin Inkhel Tur
ATK Mohun Bagan 7:30 PM Kerala Blasters

November 20, Inrinni Zan
Bengaluru FC 7:30 PM NorthEast United

November 21, Pathianni Zan
East Bengal 7:30 PM Jamshedpur FC

November 22, Thawhṭanni Zan
Mumbai City 7:30 PM FC Goa

November 23, Thawhlehni Zan
Hyderabad FC 7:30 PM Chennaiyin FC

November 24, Nilaini Zan
Odisha FC 7:30 PM Bengaluru FC

* Inkhel hi Star Sports-ah live-a en theih a ni ang.
* Online-a en duh tan Disney+ Hotstar leh Jio TV-ah en theih a ni ang.