ISL champion lawmman Vbch 6

Indian Super League champion-in vaibelchhe riat an hlawh ṭhin chu vaibelchhe rukah tihhniam a ni a, pahnihnain vaibelchhe li an dawn ṭhin chu vaibelchhe thum tih a ni ta bawk.

Hetiang a nih rual hian league table-a sang ber lawmman dawn ṭhin, cheng nuai 50 chu vaibelchhe 3.5-ah tihsan a ni ta thung a, league table chung ber luaha champion bawk chuan vaibelchhe 9.5 a hlawh theih tawh dawn tihna a ni.

ISL table-a top four chin chuan sum an dawng vek dawn. Semifinal-a chak zo ta lo team pahnihte chuan vaibelchhe 1.5 ve ve an dawng dawn a, ISL-a top four chinin an insem tur sum hi vaibelchhe 15.5 a tling tihna a ni.

Hlawkna ang zawnga thlir erawh chuan top four chin sum dawn tur hi a tam lo a, eng tham a ni lo. Mahse, ISL club-te hian sponsor leh television rights aṭangin sum an hmu tel ve tih hriat a ṭha a, khawvel eng league-ah pawh lawmman hi club-ten innghah nan an hmang ngai lo.

India rama football league sang ber ISL hi knockout hmanga champion zawn a nih avangin AFC lam duhdan angin league round chu ngaihhlut a ni a, league table chung ber luah chunga season khartu team chuan ISL nomawi lo chawi lo pawh ni se league-a point hmu hnem ber an nih avangin AFC Champions League an khel ang.

ISL champion chuan AFC Cup an khel dawn thung - league round a pawimawh chho tawlh tawlh zel dawn avangin ISL a la hmuhnawm chho ve zel dawn niin a lang.