Jeje a tel ve lo

Mizoramin football player kan neih langsar ber Jeje Lalpekhlua'n ISL season bul a ṭan thei dawn lo a, Mizo Sniper hming lem an pek striker hian a khup hliam vanga contract a ziah ngam rih loh thu Vanglaini a lo hrilh tawh.

Season hmasa khan ISL-ah Mizoram aṭangin player 30-in ISL an hmachhawn a, tun season-ah erawh player 27 chiah an ni dawn - season hmasa aiin player pathumin Mizoram player an tlem tihna a ni.

Mizo player langsar zingah Jeje bakah Lalchhuanmawia Fanai leh Samuel Lalmuanpuia te chu season hmasaa ISL khel, tun season-a inlan lo tur langsar zual an ni a, Mizo goalkeeper thleng sang bera chhal ngam Lalthuammawia Ralte pawh a inlan dawn lo.

Lengpui tlangval Chhuantea'n I League club RoundGlass Punjab FC a zawm a, ISL club ni tura inthuam ṭha mek Punjab club hian Mizo keeper Thuammawia an lalut bawk.

I League-a goal khung thei naupang ber record lo siam tawh Samuel-a'n Odisha-ah contract a la nei mek a, mahse, Shillong Lajong captain hlui hian first team training a la zawm rih lo.