Indian coach hmasa ber Khalid

I League chanchina Indian coach hlawh hnem ber lo ni tawh Khalid Jamil-a'n thawnthu thar a ziak leh ta a, Mumbai tlangval hi Indian coach zinga ISL coach nghet hmasa ber a ni dawn.

Highlander-in season hmasaa Gerard Nus an ban khan assistant coach Khalid chu coach lailawk ni turin an ruat a, Aizawl FC coach hlui hian match kua chhung tlawm nei loa kaltluanpuiin semifinal a hruai thleng.

NorthEast United neitu, Bollywood star lar John Abraham-a'n Khalid-a hnathawh a hmuh hmaih lo a, coach nghet turin a ruat - Khalid-a tan chona phurawm a ni.

Khalid-a'n coach hna a chelh dawn tih a chian rualin Aizawl FC lama a lo hlawhtlinpui tawh player a thlir a, Hyderabad FC aṭangin R. Laldanmawia a lalut a, a hman thiam sa, Jamshedpur striker William Lalnunfela a thlem lut bawk.

Highlander hian Emanuel Lalchhanchhuaha, Joe Zoherliana, Lalkhawpuimawia leh Rochharzela an nei bawk a, Khalid-a hnuaia Mizo player-te khelh dan tur en a châkawm ta.

NorthEast United hian an player langsar Lalengmawia chu Mumbai City-ah chân mah se Federico Gallego leh Deshorn Brown te ho an chelh thei a, an chhe lo.