WTA Finals champion Muguruza

Garbine Muguruza chuan nimin khan Anett Kontaveit hnehin WTA Finals nomawi a chawi a, hmeichhe tennis ranking sang zual pariat inelnaah hian a vawi khat nan a champion.

Spanish nula hi Guadalajara, Mexico-a inelna neihah a khel ṭha thei hle, nomawi inchuhna inkhelah pawh hian harsatna lian tham a tawk meuh lo. Estonian star lakah hian 6-3, 7-5 in hnehna a chang.

Seeded parukna Muguruza-i'n inkhel tir lamah a khingpui service a chhuhsak nghal a, tun hnai hmasawn tak Kontaveit-i'n bei let viau mah se a tho chhuak zo lo, set hnih an khelh chhungin tawnhriat nei ṭha zawk Muguruza a chungnung zawk.

Kum 28 mi Muguruza chuan, "Khawvela a ṭha ber ka ni thei tih chu a takin ka lantir niah ka ngai, season thar lo awm leh tur atan ranking ka siamṭha a, inrintawkna sang tak nen chawlh ka hmang thei dawn.

"Tun hnai kum thum chhung vel chu ka khel ṭha tawk lo, hman deuha nuamti taka result ṭha ka neih ṭhin ang kha ka hlat riau. Mahse, tunah chuan nuam ti takin ka khel leh thei tawh, inelna lian zawkah pawh round sang zawk ka thlen leh theih tawh ka besei," a ti.

Muguruza hian French Open leh Wimbledon title pawh a la tawh, tun hma deuh chuan world ranking-ah pawh a sang ber a ni hial. Ranking tharah chuan number 3 a ni leh dawn ta a, kumina a chet dan thlir chuan season tharah pawh player hmuhnawm berte zinga mi a nih a rinawm.