Barca player thar Alves a phur

Barcelona chuan an player hlui Dani Alves chu lawm takin an lo dawngsawng a, kum nga a vah bo hnua kir leh chauh ni mah se Catalan club tan beisei a la neih reng thu a sawi chhuak.

Xavi Hernandez-a'n Barcelona a enkawl hnua a player lakluh hmasak ber chu Alves hi a ni a, kum 38 mi ni tawh mah se tleirawl thaza ang maiin a ke chheh a la zang haih mai a, boruak a ngam dan pawh a la danglam chuang lo.

Brazilian defender Alves chuan, "Ka beisei phak baka ṭhain min lo dawngsawng, ka hun tawn hmasak ai kha tunah hian ka ṭha tawk zawk. Hmanah khan duhthusam ka nei a, a la tawp lo. Tunah pawh Barcelona tana khelh leh hlawhtlinna chanpui hi ka duhthusam a la ni reng.

"Barcelona leh Cata-lunya vul reng rawh se," tiin Barcelona fans hmaah a sawi a, fan-te chu duhsakna a hlan zui bawk. Nakkum January thla aṭangin a club tan hian a inkhel thei ṭan chauh dawn thung a ni.

Alves chuan sawi zawmin, "Ka mi ngaihsan leh ngainat Andres Iniesta bakah Hristo Stoichkov-a'n a lo hak tawh jersey number 8 chu ka ha chhawng ve leh dawn a ni a, hei hian mi ti phur zual," a ti.

Barcelona hian season bul an ṭan fuh tawk lo. La Liga-ah point 17 chauh la hmuin pakuana an ni mek, hmahruaitu Real Sociedad an phak lohna chu point 11 zet a ni tawh. League match khelh hmabak an la ngah avang erawh chuan thil a la danglam thei ang.