Semifinal-ah Djokovic a lut

Novak Djokovic chuan ATP Finals khelh laiah semifinal a inhlangkai der tawh. Serbian star hian Nilaini zan khan Andrey Rublev hnehin group stage a paltlang a, knockout round hi vawi 10 a luhna a ni.

World number 1 Djokovic hian ATP Finals nomawi chawi hnem ber Roger Federer (6 titles) nih rual a tum mek a, record ṭha ber umphak tur hian match hnih chauh chak a mamawh tawh, semifinal thleng tur hian Rublev hi 6-3, 6-2 in a hneh.

A match hmasa zawkah Djokovic-a'n set hloh loin Casper Ruud a lo hneh tawh bawk, tun ṭumah pawh straight set hmang bawka a chak leh tak avang hian Green Group hmahruaitu a ni dawn tih a chiang nghal bawk.

Kum 34 mi Djokovic hian hmanni deuh khan Paris Masters title a la, tournament pahnihah a zawna champion a tum mek. Paris Masters final-a a hneh Daniil Medvedev pawh tun ṭumah hian a la dam, nomawi inchuhna inkhelah an intawng leh mai thei.

Russian star Medvedev hi ATP Finals champion lai a ni a, ani pawh hi Red Group hmahruaitu niin semifinal a lut chiang tawh. Tuna a lan dan chuan Djokovic nen bawk hian final-ah an intawn leh ngei a rinawm.

ATP Finals khelh laiah hian Stefanos Tsitsipas erawh a inlan chhunzawm thei dawn tawh lo. Greek tlangval hi a kiu a hliam a, 2019 champion hian group match vawi khat bak a khel hman ve ta lo. A match hmasaah hian Rublev a ngam lo a ni.