Giannis-a hoin Lakers an hneh

Giannis Antetokounmpo-a'n Los Angeles Lakers lakah point 47 ngawt a nei a, Greek tlangval thil tih ropui hmang hian NBA champion lai Milwaukee Bucks chuan Lakers lakah 109-102 in hnehna an chang.

Nimin zing NBA regular season inkhelah Giannis hian hun chanve hmain point 28 a nei thei tawh a, inkhel pawimawh leh boruak sangah a zam ve ngai lo tih lantirin hun tawp dawn thlengin a ṭangkai chhunzawm.

Kum 26 mi Giannis chuan, "Kuminah chak loh kan ngah a, vawi riat ngawt kan tlawm tawh avangin chetsual a pawi thei tawh. A tir aṭanga a tawp thlengin ṭang leh fimkhur tak chungin kan khel, a vawi sarih nana kan chak ve hlauh hi a lawmawm," a ti.

Lakers hian LeBron James an la chhawr thei lo. NBA Most Valuable Player ni tawh hi tun hnaiah match 10 chhung a inkhel thei lo, an match lehpeka Boston Celtics an hmachhawn hunah chuan a inlan theih tawh a rinawm.

James awm loh karah Talen Horton-Tucker chuan point 25 a nei a, ani bakah hian point 19 neitu Russell Westbrook chu che ṭha pangngai viau mah se team chakpui nan a tawk zo lo a, tun season chhunga a vawi riat nan an tlawm ta a ni.

Inkhel dangah Devin Booker-a point 24 neih hmangin Phoenix Suns chuan Dallas Marvericks 105-98 in an hneh. Suns hian a zawnin match 10 zet hnehna an chang ta a, nikum ang bawkin regular season chu an hmang ṭha leh viau dawn niin a lang.

Tun hnaia match nga chak zawn tawh Washington Wizards erawh an tlawm. Wizards hi Charlotte Hornets lakah 97-87 in an tlawm. Inkhel dangah Brooklyn Nets leh Orlando Magic te chuan an khingpui ve ve an hneh bawk.