SABA Championship-ah Lalrina telna India team-in nomawi chawi dawn

SABA Championship-ah vawiin tlai dar 2:30 hian India-in inelna thlengtu Bangladesh an hmachhawn dawn. Mizo tlangval Lalrina Renthlei telna India hian an match hmasa pahnihah Maldives leh Sri Lanka an sawp avangin match tawp ber an khelh hma hauhin an champion chiangah a ngaih theih.

India hian an match hmasa berah Maldives 88-31 in an sawp a, Tuikhuahtlang tlangval Lalrina'n India tana a match hmasa berah hian minute 20 khelin point hnih a neih bakah assist vawi ruk a nei a, steal vawi nga leh rebounds vawi thum a nei bawk.

Match hnihnaah India hian Sri Lanka 114-48 in an sawp. Mizoram Super League-a vawi li champion tawh Lalrina'n match hnihnaah minute 12 a inlan a, point ruk neiin assist leh rebounds vawi thum ve ve a nei a, steal vawi hnih a nei a, a khel pangngai.

Mizo tlangval Lalrina chuan, "Kan champion chu a ni ber tawh e. South Asia team dang nena kan danglamna chu kan sanna hi a ni a, kan 'big man' te chang thei tur kan khingpuite hian an nei lo. India hian Asia Cup, World Cup qualifier leh inelna lian zawk a khelh tam avangin South Asia-ah chuan an ṭha fal hrim hrim," tiin Vanglaini a hrilh.

Nimin khan Sri Lanka-in Maldives 77-45 in an hneh a, pakhatna dinhmun an hauh mek. Point an pek dan hi football nen a inang lo a, a chakin point hnih an hmu a, a chak loin point khat an hmu thung. Amaherawhchu vawiin hian India an inlan ang a, an chak lo a nih pawhin Sri Lanka point hmuh zat an hmu thei a, an point difference a ṭha bawk ang. Chutihrualin an khelh tawhna thlir chuan India tan chak loh theih dan a awm loah a ngaih theih thung.

SABA Championship-ah hian India hian record an nei ṭha ber hrim hrim a, ṭum sarih an neih tawhah vawi nga an champion. Sri Lanka (2018) leh Bangladesh (2013) te hi vawi khat ve ve an champion tawh a, tun ṭumah erawh India hi team dang chunga leng an ni.